-
O santiagués augura un encontro moi difícil que hai que vivir co corazón quente, pero a cabeza moi fría
Santiago de Compostela, a 19 de Xuño de 2018.
A SD Compostela goza este martes do seu día libre para recargar forzas para a Final do Playoff de Ascenso á Segunda B. Con todo, xogadores e afección, están a desexar que chegue ese día para buscar que non sexa un domingo calquera. Entre eles, Álvaro Casas, quen afronta o seu primeiro playoff, confía en cada un dos seus compañeiros para acabar logrando o obxectivo.
“Esta semana é diferente á demais, xógasta na casa, coa túa xente, vai vir moita de Salamanca, polo que o ambiente vai ser unha pasada o domingo e oxalá se acabe co ascenso, que é o que queremos todos”, explicou Álvaro Casas en rolda de prensa.
O central, que xogou todos os partidos destas eliminatorias, asegurou que o equipo está mentalizado para o encontro do domingo. “Sabemos que é unha final, un partido a todo ou nada e do que dependerá estar o ano próximo en Segunda B ou en Terceira”, dixo.
A pesar de que chegan algo cansos, despois de 11 meses de tempada, Casas manifestou que sacarán forzas de onde sexa, tanto mentais como físicas, para gañar o partido. “O playoff foi un sobe e baixa de emocións, empezando con moitas ganas contra o Espanyol, pero despois sufrindo o noso peor momento entre o Dani Jarque e a ida contra o Terrassa. Despois, veu a remontada e o empate en Salamanca que nos dá ese empuxe para ir a polo partido”, analizou.
A pesar diso, o central advertiu que, malia que confía plenamente en cada un dos seus compañeiros para lograr o obxectivo, deben ter a cabeza moi fría. “Nestes partidos hai que ir co corazón quente, pero a cabeza moi moi fría e máis contra un rival que empezou perdendo 2-0 contra o Poblense, tamén contra o Mutilvera, e mesmo remontando en todos os partidos de local, polo que seguro que non lle perderá a cara ao partido en ningún momento”, argumentou.
Ademais, enxalzou as calidades dun CF Salmantino UDS que non lle sorprendeu na ida. “Eles son un equipazo, a pesar de ser un cuarto, o seu grupo é moi complicado, saben ao que xogan, son moi físicos e curtidos nestes partidos, e non lles pesa a presión. Ademais, saben que cun gol complícannos as cousas, así que nós temos que pensar que quedamos a ceros na ida e ir gañar”, detallou.
Precisamente, respecto do último, Álvaro recalcou en que o de Salamanca é pasado e que hai que centrarse só nesta final. “Aínda que recibamos un gol, temos que seguir xogando, pero o obxectivo é manter a nosa portería a cero e ir a gañar”, sentenciou.
Co apoio dunha afección que non para de mercar entradas, tanto nas oficinas do club como nos locais habilitados para a venda, Álvaro e todos os seus compañeiros esperan alcanzar ese soño polo que levamos peregrinando toda a tempada.
