-
O lateral asegura que tentarán ter o control de xogo, como na primeira metade
Santiago de Compostela, ao 18 de xuño de 2018.
A SD Compostela volveu este luns ao traballo despois de xogar onte no Helmántico a ida da Final do Playoff de Ascenso á Segunda División B. O partido acabou con empate a un gol, grazas ao tanto dun Álvaro Naveira que pasou hoxe por rolda de prensa.
O lateral esquerdo, arroupado polos seus compañeiros de equipo, reflectiu na sala que espera que o ambiente deste domingo en San Lázaro sexa, aínda mellor, que o do día do Terrassa FC. “Canta máis xente veña, mellor para nós”, comentou.
O obxectivo non é outro que o domingo acabar celebrando un ascenso. “Temos ganas de que chegue o partido e que sexa unha festa, esperando que sexa así”, explicou.
Para alcanzalo, a clave para Naveira pasa por “ter o control de xogo, como fixemos na primeira parte do Helmántico, porque neses momentos eles non xeraron perigo”.
Outro factor importante, será non confiarse, xa que o Salmantino é un equipo que se caracterizou por remontar as súas eliminatorias nos partidos de volta. “Temos que saír coma se na ida quedásemos cero a cero, non especulando, e tentando dominar”, argumentou.
En canto ao rival, o lateral dixo que se atoparon o que esperaban, un equipo “con xente moi forte, que colga balóns á área e que aproveitaron o apoio da súa afección para crearnos perigo”. Para a volta, esperan “un rival similar, que especulará un pouco e tentará marcar algún gol para pasar”.
Con todo, Naveira non poderá estar na gran final pola amarela que recibiu no minuto 89. “É un pau, pero tiña que facer falta e agora tócame animar aos compañeiros para que o fagan ben”, remarcou.
A pesar diso, de momento queda co bo sabor de boca polo tanto logrado, un gol augurado por Rubén, o asistente do mesmo, antes do comezo do encontro. O seu soño é que esa diana sirva para lograr o soño do ascenso.
