-
O lateral e o mediocentro amplían un ano a súa vinculación co Compos
Santiago de Compostela, a 2 de Xullo de 2018.
Cesáreo Seoane Mella ‘Saro’ e Samuel Rodríguez Noya ‘Samu’ renovan o seu contrato coa SD Compostela por un ano máis. Ambos xogadores seguirán vinculados a un proxecto ao que se uniron hai dous anos e no que foron parte fundamental nel.
Ambos, un de Santiago e outro de Bembibre -Dubra-, creceron durante estes dous anos no club santiagués, con quen disputaron a súa primeira fase de ascenso á Segunda B e desexan seguir superando barreiras dentro dun proxecto con xente de aquí.
Saro Seoane apropiouse durante estas dúas tempadas do lateral dereito do equipo branquiazul, tras chegar procedente do Noia CF de Yago Iglesias. O santiagués, a pesar de contar coa competencia de Sergio Pereira este pasado ano, roldou os 3.000 minutos de competición en ambas tempadas.
Na primeira, o carrileiro destro xogou 35 partidos de liga, dos que 33 foron saíndo de inicio, e nos que conseguiu anotar un gol e repartir numerosas asistencias nas súas continuas subidas pola banda. Este curso, Saro disputou 30 encontros de liga, 27 de titular, aos que sumou os seis duelos completos de playoff. Igualmente, conseguiu meter un tanto e sumou varias asistencias.
Pola súa banda, Samu Rodríguez alternou durante estas dúas tempadas períodos de moita importancia, con outros nos que tivo menos minutos, na posición con maior competencia do equipo. Este curso disputou en liga 25 encontros, dez deles de titular, nos que conseguiu dous tantos, pero no playoff foi unha peza fundamental, saíndo de inicio en cinco dos seis choques e portando o brazalete de capitán en dous deles. Ao final, superou os 2.000 minutos de xogo.
Na súa primeira tempada en Santiago, tras chegar tamén do Noia CF de Yago Iglesias, Samu xogou 19 partidos, con 16 titularidades, para superar o milleiro de minutos en competición, nos que tamén conseguiu marcar dous goles.
Con estas dúas renovacións son xa nove os xogadores que teñen contrato para o próximo curso, oito deles que seguen no club, polo que se segue confirmando a base do proxecto.
