[cs_video column_size=”1/1″ video_url=”https://youtu.be/2j7WV-7HpvA” video_width=”500″ video_height=”250″][/cs_video]
-
Ambos recalcaron a necesidade de continuar co proxecto e unidos á cidade
Santiago de Compostela, a 2 de Xullo de 2018.
A sede de Kia Compostela Concesionario no Polígono do Tambre foi o lugar elixido pola SD Compostela para selar en público a renovación, por unha tempada máis, do adestrador Yago Iglesias.
No acto estiveron presentes Antonio Quinteiro, presidente do club, Aurelio Novoa, xerente de Compostela Concesionario, e o propio Yago Iglesias, quen analizou a nova tempada que se aveciña e a continuidade dun proxecto que cumprirá o seu terceiro curso.
Antonio Quinteiro, en primeiro lugar, agradeceu a Kia pola axuda na tempada pasada e augurou que continúe esa vinculación para o próximo curso. Ademais, tamén tivo palabras de agarimo para Yago, a quen agradeceu que aceptase a renovación.
O presidente recalcou que non será fácil repetir o logrado o curso pasado, pero recoñeceu que Yago ten a capacidade para seguir guiando a este proxecto, con futbolistas de Santiago, mozos, e para xente de aquí. Lembrou tamén que xogadores e corpo técnico teñen que prepararse para gozar dun premio como é a Copa do Rey.
“Non debemos pensar no feito a tempada pasada. Con constancia e seriedade podemos volver repetilo, pero non será unha esixencia. A clasificación para o playoff é algo necesario e para iso o club apoiará o teu traballo -por Yago- e darémosche os medios necesarios para que o desenvolvas xunto ao corpo técnico”, analizou o mandatario.
Para terminar, remarcou que o club tentará manter esa unión entre equipo e cidade para que as bancadas de San Lázaro se vistan como categorías superiores.
Yago Iglesias agradeceu ao club pola confianza mostrada en todo o corpo técnico. “Hai dous anos que comezou esta peregrinación nun proxecto a medio/longo prazo, estamos a dar pasos firmes, imos polo bo camiño e aínda que o listón está alto, ese puxémolo nós e por iso queremos volver a vivenciar o deste último mes e medio”, argumentou.
Ademais, engadiu que “o club e a cidade deben ir da man e ese é o noso obxectivo, seguir formando a eses mozos xogadores que son importantes na actualidade e máis aínda no futuro”.
No relativo á continuidade dos xogadores que aínda non selaron a súa renovación, Yago dixo que saben que é difícil mantelos despois da tempada que fixeron, aínda que destacou que “a senda do proxecto é clara, desexan que poidan seguir a maioría dos xogadores posibles e niso está a traballar Manu Castiñeiras”.
Por último, Aurelio Novoa comentou que é unha satisfacción colaborar coa SD Compostela, “o equipo emblema na cidade, algo que se mostra en como se viron as bancadas de San Lázaro e seguro que, despois do pasado curso, o ascenso estará aí”.
