-
O dianteiro, con experiencia en Segunda B, firma por unha tempada
Santiago de Compostela, ao 6 de xullo de 2018.
Brais Abelenda Negreira (Bembibre, 1995) converteuse esta tarde en novo xogador da SD Compostela. O dianteiro, con experiencia en Segunda División B, firma por unha tempada co conxunto branquiazul, regresando a Santiago, cidade onde xogou na súa etapa de xuvenil.
O cuarto reforzo para o proxecto compostelanista é un dianteiro novo, aínda que tamén pode actuar en banda, que desenvolveu a súa carreira futbolística, principalmente, no Racing de Ferrol, conxunto do que procede.
Tras xogar o último ano de xuvenís no Levante de División de Honra, o novo xogador do Compos regresou a Galicia para competir no seu primeiro ano sénior no Racing de Ferrol. Tras unha primeira parte de ano con escaso protagonismo, no mercado de inverno marchouse ao Cerceda, onde xogou 15 partidos, sete deles de titular, e marcando dous goles.
Ao seguinte curso, tras realizar a pretempada no Racing de Ferrol, foi cedido ao seu filial de Terceira División, o Galicia Mugardos. Alí, o dianteiro disputou 35 encontros de liga, todos menos dous desde o once inicial, nos que anotou nove goles, o seu récord goleador nunha campaña ata o momento.
O seu bo rendemento en Terceira deulle a oportunidade de novo de xogar en Segunda División B co Racing de Ferrol os dous últimos cursos. En ambos anos, Brais foi de menos a máis, gañando protagonismo a medida que avanzaba a tempada. En total, o punta xogou 45 encontros, once deles saíndo de inicio, aos que sumou os partidos de Copa Deputación e Copa do Rey. Pechou a súa etapa na cidade departamental con catro dianas.
Coa súa chegada ao Compos, Brais espera recuperar a continuidade no xogo e demostrar o nivel que atesoura, o cal lle levou a poder competir nun conxunto de Segunda División B como o Racing de Ferrol.
Coa súa incorporación, a SD Compostela asina ao seu cuarto reforzo e aumenta a cifra de xogadores ata os 16, con doce que seguen no proxecto.
