-
O sorteo da Copa do Rey será ás 12.00 e o de Liga ás 18.00 horas.
Santiago de Compostela, a 29 de Xullo de 2018.
A SD Compostela terá un luns moi atarefado, xa que coñecerá, por unha banda, o calendario de liga do Grupo 1 da Terceira División e, polo outro, o rival da primeira rolda da Copa do Rey.
No primeiro caso, o sorteo puro das 38 xornadas de competición ligueira do Grupo 1 da Terceira División, no que estará no bombo a SD Compostela, levarase a cabo mañá luns ás 18.00 horas na sede de Santiago da Federación Galega de Fútbol.
A liga iniciarase o fin de semana do 25-26 de agosto, a falta de ratificación por parte das asembleas da Real Federación Española de Fútbol e da Real Federación Galega de Fútbol, respectivamente.
Pola súa banda, pola mañá, a partir das 12.00 horas, a SD Compostela coñecerá o rival da primeira rolda da Copa do Rey. O club santiagués entra no bombo do torneo copeiro tras ser o campión do Grupo 1 da Terceira División.
No acto, que terá lugar na sede da Real Federación Española de Fútbol, o equipo santiagués poderá quedar encadrado cos equipos clasificados do Grupo 1 da Segunda División B: Fuenlabrada, Navalcarnero, Internacional de Madrid, Rápido de Bouzas, Cultural e Deportiva Leonesa, Unionistas e Mensajero.
A primeira rolda disputarase a partido único o mércores 5 de setembro e xogarase no campo no campo do club cuxa bóla fose extraída en primeiro lugar. Dos 41 equipos que entran en liza, cinco deles quedarán exentos desta eliminatoria e pasarán directamente á Segunda, programada para o seguinte mércores 12 de setembro.
Doutra banda, este mércores 1 de agosto a SD Compostela medirase nos dezaseisavos de final da XXX Copa Deputación da Coruña ao vencedor do partido que disputan esta tarde ás 19.00 horas o Bertamiráns FC e o Puebla CF.
