-
Golpe de autoridade do Cadete A ao superar 0-2 ao Amio, segundo agora a 9 puntos
Santiago de Compostela, a 25 de Febreiro de 2019.
Os catro equipos da base da SD Compostela que marchan de líderes nas súas respectivas clasificacións seguen a súa traxectoria con paso firme. Especialmente destacado foi o golpe de autoridade do Cadete A, superando ao segundo clasificado e aumentando a súa renda os 9 puntos. Os outros primeiros clasificados son, en fútbol 8, o Benxamín A, o Prebenxamín B e o Biberón.
Pola súa especial transcendencia, en primeiro lugar, destacamos ese triunfo do Cadete A contra o Amio SD. Os branquiazuis superaron a final que tiñan por diante no Campo do Sergas cun sobresaínte. Nun partido moi serio, os nosos venceron por 0-2, con goles de Xoel Caamaño, no 26, e de Christian Fernández Barbazán, no 70. Cos tres puntos, o equipo ascende ás 70 unidades, co gol average gañado e nove de vantaxe sobre o seu inmediato perseguidor, malia que cun partido máis.
Outro importante triunfo que nos deixou o domingo foi o do Zona Vella no derbi contra o Atlético Fátima. O filial redimiuse do partido da primeira volta cunha vitoria que chegou no minuto 88. Pese ao 2-0 inicial para os locais, os branquiazuis déronlle a volta ao marcador cos tantos de Sergio Cea, Anxo García e Iván Varela. Con todo, o Fátima volveu empatar no 84, pero Isaac Trillo levou o delirio a dous minutos para a conclusión, certificando uns tres puntos que nos manteñen sétimos.
En xuvenís, descansou o A polas seleccións, pero si xogou un Xuvenil B que logrou un meritorio empate contra o Noia, cuarto clasificado. Marcos Andrade marcou a sete para a conclusión, pero os nosos cederon, de novo, dous puntos no último minuto.
A diferenza do equipo de Primeira Autonómica, o Cadete B non puido continuar coa súa boa xeira do 2019, logo de caer 4-1 na súa visita ás ED de Vedra. Zubo Yang adiantou aos branquiazuis no minuto ún, pero os locais acabaron remontando. Do mesmo xeito, o Infantil A cortou o seu bo facer neste ano cunha derrota por 6-0 contra o Bertamiráns.
Dentro das categorías de fútbol 8, coa maioría dos equipos inmersos nas segundas fases dos campionatos, os resultados foron dispares. O Alevín A, segundo clasificado no playoff, perdeu pola mínima, 1-0, ante o Escola Estrada, líder da táboa. Este mesmo resultado, pero ao seu favor, logrouno o Alevín B contra o Milladoiro.
Baixando de categoría, o Benxamín A empatou (0-0) contra o Atlético Fátima, segundo clasificado, polo que mantén a vantaxe de dous puntos no playoff. Pola súa banda, o Benxamín B perdeu contra o Villestro.
Nesta segunda fase, o Prebenxamín A caeu contra o Amio, mentres que o Prebenxamín B superou ao Touro para seguir cunha clara vantaxe no liderado. E por último, o Biberón subiu ao primeiro posto da clasificación ao gañar ao La Salle, na estrea da segunda volta da Segunda División.
