[cs_video column_size=”1/1″ video_url=”https://youtu.be/sZcyvcHEc9Q” video_width=”500″ video_height=”250″][/cs_video]
-
O equipo busca o terceiro triunfo seguido para seguir adozando o Tourmalet
Santiago de Compostela, ao 22 de marzo de 2019.
A SD Compostela regresa este domingo ao seu fortín coa intención de seguir adozando o Tourmalet. Ante a visita do Porriño Industrial, os nosos queren sumar o seu terceiro triunfo consecutivo, segundo de local, e prolongar unha xeira que os colocou na pelexa polo primeiro posto da clasificación. Para iso, a pesar da súa posición, chega un rival que vén de vencer ao Paiosaco.
“Levamos falando toda a semana do efecto do cambio, porque é unha xornada importante para referendar as boas sensacións das dúas últimas, sendo ademais moi sólidos tras catorce partidos seguidos encaixando”, explicou Yago Iglesias en rolda de prensa.
Precisamente, a posición na táboa fará que os visitantes cheguen a Santiago sen presión algunha. “Veñen sen nada que perder, con xogadores con experiencia en categoría superior, como Tubo ou Claudio Giráldez, polo que temos que dar nosa mellor versión, sendo agresivos con e sen balón”, sinalou o técnico.
Nese mesmo sentido, o capitán Álvaro Casas, comentou que o Vero Boquete é un campo no que “todo o mundo quere facelo ben, polo se que te relaxas, píntanche a cara”.
Outros dos aspectos para ter en conta será o modelo de xogo do rival, un conxunto que aposta polo fútbol combinativo. “Salvando as distancias, gústalles ter a pelota como a nós, xa que o seu perfil de xogadores convídalle a iso, pero é certo que cara a portería rival fáltalles acerto e na propia encaixan moito”, analizou Yago.
Por tanto, ambos deixaron claro que todo depende do labor propio. “Se estamos na liña que debemos, será un duelo para gozar e vernos levantados ao final do día”, reflectiu o adestrador. Con todo, os branquiazuis non miran a terceiros, senón só ao seu traballo. “Temos que sacar os tres puntos e se despois os resultados nos favorecen, mellor, pero non so o duelo de líder, senón o do Arosa contra a UD Ourense, o Barco ou o Alondras”, remarcou.
Para alcanzar o obxectivo marcado para este domingo, o corpo técnico prevé, como sempre, certos cambios no once inicial, malia que sempre pensando na “mellor formulación para sacar o encontro adiante”. En base ao que elixan, con máis ou menos modificacións, serán os futbolistas os que ao final o fagan bo.
Unha semana máis, a fortaleza do fortín santiagués marcará o devir do equipo, un Compos que quere seguir loitando por todo e que soña con sumar tres triunfos seguidos. A tarefa non será sinxela, pero co apoio dos seus e a dinámica positiva, agardan progresar nesta peregrinación.
