-
Dobrete na categoría nunha fin de semana con tinguiduras agridoces en fútbol once
Santiago de Compostela, a 29 de Abril de 2019.
A dobre vitoria dos conxuntos cadetes da SD Compostela mellorou unha xornada na que os equipos de fútbol 11 tiveron un sabor agridoce, xa que tan só se sumou a do Alevín no seu segundo encontro da liga.
En primeiro lugar, ao Zona Vella ségueselle resistindo a vitoria nestas últimas semanas e este domingo non puido pasar do empate a uns contra o Berres. O resultado puido ser mesmo peor, xa que Borja Collar empatou a contenda no minuto 84.
Sufriu tamén un duro revés nas súas aspiracións polo ascenso o Xuvenil A, que xa cantaba vitoria na súa visita ao Residencia, pero que acabou volvendo sen carga tras un aciago desconto da segunda parte. Yago Recarey puxo aos branquiazuis con vantaxe no 51, pero os lucenses déronlle a volta ao luminoso con tantos no 92 e 94. Pola súa banda, o Xuvenil B tampouco tivo o seu mellor día e caeu por 7-3 ante o Calo, un duelo no que Christian Barbazán, Juan Amigo e Marcos Andrade maquillaron o resultado.
En cadetes, o domingo si foi frutífero logo de sumar ambos os tres puntos, e con portería a cero. O Cadete A, campión do seu grupo, sumou un novo triunfo ao superar ao Villestro por 7-0. Nesta penúltima cita, Hugo Pérez marcou un hat trick e Adrián Álvarez, Gerardo Lago, Jaime Álvarez e Iker Carril repartíronse os catro restantes. Mentres tanto, o Cadete B venceu por 4-0 ao Touro, para seguir como quinto clasificado, con tantos de Zubo Yang, Rubén Sande, Sergio Rendo e Xaime Paz.
Baixando de nivel, o Infantil A caeu pola mínima (0-1) ante o Milladoiro, conxunto que lle supera na táboa, mentres que o Infantil B perdeu por 3-0 contra o Villestro no seu debut na Copa de Santiago.
Sumou tamén de tres o Alevín de fútbol 11 logo de superar con claridade ao Cacheiras. Ese 0-7, polos goles a favor, colócano como segundo.
En fútbol 8, o Benxamín A pechou o playoff de descenso no primeiro posto, a pesar de caer na última xornada contra o Atlético Fátima. O Prebenxamín B, pola súa banda, pasou a semifinais da Copa de Santiago, ao superar ao EF Lalín no Manuel Anxo Cortizo.
Por último, o Biberón de fútbol sala caeu na volta da copa ante o Calo, polo que queda eliminado, mentres que o de campo gañou o seu primeiro encontro contra o La Salle.
