-
Os branquiazuis foron superiores aos lucenses, pero careceron de fortuna
Santiago de Compostela, a 1 de Maio de 2019.
A SD Compostela caeu por segunda xornada seguida, malia que o fixo de pé. Os branquiazuis foron superiores ao Racing Villalbés, pero acusaron a enorme efectividade dos visitantes, capaces de anotar nas súas dúas únicas aproximacións. A pesar da insistencia, e en contra do vento, o Compos mereceu maior fortuna.
Villares adiantou aos visitantes no seu primeiro disparo a porta, ao fío do descanso, vantaxe neutralizada por Miki, cun remate de cabeza. Con todo, a través doutro cabezazo, obra de Xusto, os tres puntos viaxaron para Lugo.
Chegaba o Compos ao Vero Boquete con sede de vitoria. Os branquiazuis, con varios cambios no once titular, buscaban volver sumar de tres ante o seu público e recuperar sensacións neste final de liga. Con todo, os nosos atopáronse cun Villalbés que plantou dúas liñas de cinco enfronte da súa área e que tapaba todos os ocos posibles a través da acumulación de xogadores.
Ao mesmo tempo, o vento furacanado complicaba aínda máis a elaboración do xogo de ataque, polo que o partido avanzaba con continuas interrupcións no xogo. Nunha delas, e tras varios minutos colocando os valos que voaran, os visitantes atoparon un premio excesivo.
Santi Taboada colgou a falta á área, a defensa despexouna, pero o rexeite caeu na frontal a Villares, quen soltou un gran disparo colocado que acabou na rede tras pegar no pau.
Era o minuto 42 e os nosos víanse por detrás despois de dominar todo o período. A pesar diso, á saída dos vestiarios, o equipo imprimiu unha marcha máis e comezou a asediar sobre a área de Pita. Primeiro, Aythami marrou de cabeza na área pequena tras centro de Marcos Remeseiro, cando tiña todo a favor, e ao minuto, o propio mediocentro coruñés enviou fóra tamén coa testa ao balón colgado por Naveira.
E tanto foi o cántaro á fonte, que á terceira foi a vencida. Esta vez foi Brais Abelenda o que puxo o esférico ao segundo pau e Miki, que acababa de entrar ao campo, puxo o empate coa cabeza. O de Nigrán entrou desde atrás e rematou de primeiras ao fondo da rede, logrando o seu segundo tanto da tempada.
Con todo, a pesar da insistencia, o Villalbés púxose de novo en vantaxe no seu segundo achegamento de todo o partido, con claro protagonismo de Santi Taboada. O ex do Compos lanzou unha falta con potencia que tivo que despexar a córner Anxo e, desde a esquina, colgou ao primeiro pau á entrada de Xusto. O central gañou o salto e superou ao porteiro cun gran testarazo.
Ao verse por detrás, os branquiazuis lanzáronse ao ataque, a pesar das continuas perdas de tempo dos visitantes, e tiveron o empate en dúas claras opcións. A primeira, unha falta botada por Álex Ares ao punto de penalti á que non chegou Remeseiro por culpa dun claro agarrón non sinalado polo árbitro. E no desconto, a segunda chegou cun remate de primeiras de Mon, tralo centro atrás de Miki, que se foi rozando o pau.
O marcador xa non se moveu e os lucenses celebraron unha vitoria que case lles certifica a salvación. Pola súa banda, o Compos terá que agardar unha xornada máis para asegurar o playoff, ao que poderán achegarse se superan ao Ribadumia o domingo ás 19.00 horas no Campo da Senra.
FICHA TÉCNICA:
1- SD Compostela: Anxo Pérez; Sergio Pereira (Santi, m.73), Álvaro Casas, Piscu, Naveira; Mon, Marcos Remeseiro (Rubén, m.81); Josiño (Miki, m.57), Álex Ares, Brais Abelenda; e Aythami.
2- Racing Club Villalbés: Pita; López, Vérez, Xusto, David Buyo; Javi Varela, Santi (Arón, m.87); Jose Varela, Villares (Diego Rey, m.68), Denis (Make, m.60); e Javi Ballesteros.
Goles: 0-1: Villares, min.42; 1-1: Miki, min.65; 1-2: Xusto, min.72.
Árbitro: Rodríguez Campos, colexio coruñés. Amoestou a Sergio Pereira e Piscu, polos locais; e a Santi, polos visitantes.
Indicencias: Partido da trixésimo quinta xornada de liga do grupo 1 da Terceira División disputado no Estadio Vero Boquete de San Lázaro ante 970 espectadores.
