-
O encontro xogarase o domingo 2 de xuño ás 19.30 horas
-
As entradas para abonados serán a 5€, 10€ as xerais e gratis a menores de idade
Santiago de Compostela, a 22 de Maio de 2019.
A SD Compostela sabe que neste playoff a unión entre equipo e afección será clave, do mesmo xeito que o foi o curso pasado. Baixo o lema, ‘chegareencher’, os branquiazuis pretenden volver ver o Vero Boquete a rebentar no duelo de volta contra o Deportivo Alavés B, o cal se xogará o vindeiro domingo 2 de xuño, en plenas festas da Ascensión, ás 19.30 horas.
Co obxectivo de ver as bancadas cun colorido espectacular, os prezos para este gran encontro da primeira eliminatoria da promoción serán os seguintes: 5€ para abonados, 10€ para o público xeral e gratis para todos os menores de idade.
Os abonados terán reservado o seu asento na Tribuna ata ese día, polo que despois desa data habilitarase tamén para o resto de persoas. Ademais, para entrar ao Estadio, deberán presentar na porta de acceso o el abono xunto coa entrada, mentres que os menores de idade só deberán ensinar o seu abono.
Pola súa banda, para os NON abonados, os menores de idade deberán retirar unha invitación, ben nas oficinas ou ben nos despachos de billetes o propio domingo, xa que é condición indispensable para poder acceder ao recinto.
De partida, ata o mércores 29, estarán á venda só 150 entradas de Tribuna para o público xeral, as cales se poden incrementar a partir desa data coas que non foron compradas polos abonados. Por este motivo, venderanse primeiro as de Tribuna, ata fin de existencias, e despois comezarase coas de Preferencia.
Os interesados en asistir ao encontro poderán comprar a súa entrada a partir de mañá (23 de maio) nas oficinas do club, no seu horario habitual de luns a venres de 10.00 a 13.00 e de 16.00 a 20.00 horas. Outro punto para destacar é que o xoves 30 de maio a oficina estará pechada, xa que é festivo local. O domingo 2, estas poderanse adquirir nos despachos de billetes do Estadio Vero Boquete, polo que informaremos das que estarán habilitadas e o seu horario.
O club, aproveitando que Santiago estará cheo de visitantes coa Ascensión, quere trasladar a festa ao fortín branquiazul a partir das 19.30 horas, malia que con anterioridade se organizará tamén un recibimento aos xogadores. A maxia do Vero Boquete será vital para superar esta eliminatoria.
