-
Alterna as posicións de mediocentro ou central e procede do Bergantiños
Santiago de Compostela, a 28 de Xuño de 2019.
Roberto Baleato Pérez (11/05/1990) convértese na segunda incorporación da SD Compostela para a tempada 2018/19. O xogador de Val do Dubra procede do Bergantiños FC, conxunto no que disputou as dúas últimas campañas, e firma por unha tempada.
Coa súa incorporación, o Compos faise cun xogador polivalente, que pode actuar tanto na posición de mediocentro como de central, con moita experiencia, en Terceira División e en categorías superiores, e con moita presenza física, ese perfil que buscaba o corpo técnico. Ademais, tamén destaca pola súa fortaleza no xogo aéreo en tarefas ofensivas e defensivas, así como a súa extraordinaria colocación sobre o terreo de xogo.
Aos seus 29 anos, será a súa oitava tempada na categoría, na que acumula máis de douscentos encontros, divididos entre as súas etapas no SDC Ordes, Racing Club de Ferrol, UD Somozas e Bergantiños FC. A estes engade outros cincuenta e un na división de bronce do fútbol español, todos eles nas filas da UD Somozas. A maiores, conta con catro fases de ascenso ás súas costas, celebrando un salto de categoría na 13/14.
Nos seus últimos cursos en Carballo, Baleato asentouse como un fixo nas aliñacións de Miguel Figueira, disputando 42 e 41 partidos, respectivamente, e participando activamente nos dous playoffs de ascenso do cadro vermello. En ambos superou amplamente os 3.000 minutos de xogo e conseguiu anotar 12 goles, moitos deles en xogadas a balón parado.
Trala súa firma, o equipo branquiazul conta xa con trece xogadores para a próxima tempada, con dúas caras novas, Gabri Palmás e Baleato; un regreso de cesión, Jorge Queiruga; e dez renovacións, Álvaro Casas, Álvaro Naveira, Alberto Freire, Anxo Pérez, Brais Abelenda, Josiño, Mon, Samu, Saro e Sergio Pereira.
