- O Compos superou ao Bergantiños cun gol de Samu na segunda metade
Santiago de Compostela, a 9 de Febreiro de 2020.
A SD Compostela xa ten a duodécima vitoria consecutiva no Vero Boquete no bote. Os branquiazuis superaron ao Bergantiños por 1-0 grazas ao golazo de Samu na segunda metade. Romperon ademais o seu gafe contra os de Carballo no clásico de Terceira, ampliaron a súa dinámica ata os cinco triunfos seguidos e manteñen a súa vantaxe no alto da clasificación.
Falar dun Compos vs Bergantiños é facelo dun clásico das últimas campañas, un duelo entre dous auténticos equipazos que dominaron a Terceira nestes anos. Por iso, a pesar da diferenza actual na clasificación, o Vero Boquete agardaba un choque de trens que se decidiría por pequenos detalles.
Cun día chuvioso, que provocaba que o campo estivese un pouco pesado, ambos equipos saíron coa intención de levar a batuta do esférico. Os locais, fieis ao seu estilo, e os visitantes, coa idea que tenta plasmar Lemos. Así, a bancada gozou desde o inicio dun partido atrevido e igualado.
Tras uns primeiros compases sen demasiados achegamentos, aos vinte minutos, os branquiazuis tiveron o primeiro, e vaia se o tiveron, pero escapouse por milímetros, eses que lle faltaron á pelota para cruzar a liña de gol. Primo cazou o balón mal tocado por Iago López, foise de Canedo e con todo a favor, quixo asegurar e iso provocou que ao central lle dese tempo de refacerse e sacala co pé.
Tamén crearon perigo os visitantes sete máis tarde. Neste caso, Aarón puxo o centro desde a banda, o despexe de cabeza da zaga quedou curto e Yelco, que controlou a pelota no interior da área, buscou un disparo tan axustado que se marchou rozando o pau da portería de Pato.
Cunha clara acción por bando, chegouse ao intermedio, deixando todo por decidir para a segunda metade. Nela, tralo paso polos vestiarios, os branquiazuis deron un paso adiante e non deixaron que o seu rival se achegase pola súa área. Movendo a pelota con rapidez, e de lado a lado, as ocasións para os compostelanistas comezaron a chegar con asiduidade.
Os branquiazuis saíron cunha marcha máis e aos nove minutos, por fin, mandaron o esférico ao fondo da rede. Foi nunha xogada a balón parado, na que Samu e Bicho estiveron moi listos. O primeiro sacou en curto para o segundo, o mediapunta encarou ao defensor para forzar o dous para un e deixouna suave para un Samu que en carreira, desde o pico da área, mandou un zambombazo teledirixido que se coou polo primeiro pau. Un auténtico golazo para romper o equilibrio que imperaba.
O tanto elevou os ánimos aínda máis aos nosos, que seguiron persistindo no ataque para poder lograr o segundo. Fixérono por medio de Miki, cunha gran asistencia de Bicho, pero o xuíz de liña anulou a acción por fóra de xogo. O propio extremo de Nigrán, inmediatamente despois, si a colleu en posición correcta, foise de Iago cun gran autopase e colocou un centro medido para Brais Abelenda que, por dúas veces, atopouse coas pernas dun rival e o lateral da rede.
A pesar dos cambios en ambos bandos, a iniciativa era local e a falta dun cuarto de hora rozou o gol de novo en dúas ocasións. Entre Canedo e o pau sacaron un remate de Primo desde a liña de fondo, mentres que a continuación Aarón apareceu providencial para evitar coa súa perna que unha xogada de fantasía acabase en gol. Brais Abelenda púxoa para Bicho, o mediapunta controlouna virándose e deixoulla para Miki co tacón, pero no disparo, o de Nigrán atopouse co lateral.
Sen sorte no ataque, os tres puntos pasaban por dominar a pelota ata o final e así o fixeron os branquiazuis. Sen sufrir o máis mínimo controlaron a contenda con experiencia e mesmo estiveron máis preto de aumentar a vantaxe, pero Primo, que non tiña a súa tarde máis acertada, atopouse con Canedo na última acción do duelo.
Co asubío final, o Compos levou a contenda, por fin, contra o Bergantiños. Rompeu o gafe contra os de Carballo e logrou o duodécimo triunfo consecutivo no fortín no que vai de tempada, a unha da marca histórica. Con cinco vitorias seguidas neste 2020, seguen no máis alto con catro puntos de vantaxe sobre o segundo, antes de visitar ao Fabril, o vindeiro domingo.
FICHA TÉCNICA:
1- SD Compostela: Pato; Saro, Álvaro Casas, Soto, Jimmy; Samu, Pablo Antas; Miki (Hugo Sanmartín, m.78), Bicho (Josiño, m.85), Brais Abelenda; e Primo.
0- Bergantiños CF: Canedo; Vela (Klak, m.82), Iago López, Agulló, Aarón; Toni (Antonio, m.66), Remeseiro; Yelco, Cabanillas, Cano; e Rivera (Duque, m.61).
Goles: 1-0: Samu, min.54.
Árbitro: Pereira Ferreirro (Vigo). Amoestou a Primo, Soto, Pablo Antas, Bicho e Hugo Sanmartín, polo Compos; e a Toni, Klak e Lemos (no banco), polos visitantes.
Incidencias: Estadio Verónica Boquete de San Lázaro (Santiago). Partido da vixésimo terceira xornada de liga do grupo 1 da Terceira División disputado ante 920 espectadores.
