- Ao ascenso a Segunda B, sumouse o de tres equipos da base
- O club agradece o compromiso e apoio dos patrocinadores nun ano tan complicado
Santiago de Compostela, a 28 de Xullo de 2020.
A tempada 19/20 chegou ao seu fin para a SD Compostela da mellor maneira posible, co ansiado ascenso á Segunda División B. Despois de catro anos de proxecto, o club alcanzou o salto de categoría que pretendía, e seguindo ao pé da letra os pasos marcados. Pero non só iso, senón que tamén ascendeu con tres equipos das categorías inferiores: o Xuvenil A, o Cadete A e o Cadete B.
A pesar da paralización das competicións, como consecuencia da pandemia do coronavirus, o Compos logrou o obxectivo soñado a través dun playoff exprés no que se impuxo a outros tres rivais galegos. Despois dunha Liga impecable, na que terminou en primeira posición ao chegar ao parón, os nosos deron o último paso, o do ansiado ascenso.
Con Yago Iglesias como guía do proxecto, desde que arribou en terras compostelás fai catro tempadas, o Compos seguiu un modelo de xogo moi recoñecible e cunha estrutura na que sempre se apostou por xogadores novos, con proxección e con vinculación á capital galega. Con estas bases, e tras quedar a un paso de logralo en dúas ocasións, por fin chegou a festa tan agardada.
Pechouse así o círculo na Terceira División, catro anos nos que se lograron dous títulos de liga, tres clasificacións para o playoff consecutivas, unha Copa Deputación, unha Copa Federación e na que se superou unha rolda da Copa do Rei. Do mesmo xeito, superaron marcas históricas da entidade, como a de maior puntuación do club nunha categoría nacional (86 puntos) ou a de minutos seguidos sen encaixar gol (798 minutos); e igualáronse outras, como a de vitorias seguidas (10) e vitorias seguidas como local nunha mesma tempada (13).
Categorías Inferiores
Ademais do éxito do primeiro equipo, a SD Compostela tamén tivo moito que celebrar nas categorías inferiores. Nun curso no que multiplicou o número de nenos e nenas que forman parte do sentimento branquiazul, o club logrou o ascenso en tres conxuntos de Fútbol-11.
Deste xeito, alcanzouse o ansiado salto de categoría co Xuvenil A, de Liga Galega a Liga Nacional; tamén o do Cadete A, de Liga Galega a División de Honra; e, por último, o do Cadete B, de Segunda a Primeira Autonómica.
Mentres tanto, en fútbol-8, mantivéronse as bases dun proxecto sólido, que aposta pola formación e o divertimento nos primeiros anos de contacto co fútbol, unhas idades nas que debe primar o pasalo ben, aínda que sempre seguindo os valores sans que rodean á práctica deportiva (amizade, saúde, compañeirismo…).
Patrocinadores
A maiores, e como non podía ser doutra maneira, a SD Compostela quere agradecer a todos os patrocinadores que apoiaron ao club neste ano tan convulso. Empresas que forman parte da SD Empresarial e que fan posible a continuidade e viabilidade da estrutura de club. Cada día, esta familia de empresas faise máis grande, polo que desde o club queren reiterar o seu agradecemento a todas elas polo seu compromiso, ao mesmo tempo que convidan a todas as que aínda non forman parte da entidade, que se sumen ao proxecto.
Tenda Oficial
Por último, e como un fito histórico na entidade, a SD Compostela abriu esta tempada a primeira Tenda Oficial do Club, situada na Rúa da Raíña, 8. Un espazo que se converteu nunha nova casa para os compostelanistas e na que os afeccionados poden atopar todo o merchandising do Compos.
