- O atacante de Moaña, de 21 anos, debutará en Segunda B tras renovar por un ano
Santiago de Compostela, a 5 de Agosto de 2020.
Da man da SD Compostela, Gabri Palmás debutará esta tempada na Segunda B. O atacante de Moaña, de 21 anos, estrearase na categoría de bronce tras renovar o seu contrato por unha campaña. Logo de lograr o ascenso no seu primeiro curso no club, buscará seguir aumentando o seu rendemento nun nivel superior.
A pesar da súa mocidade, Gabri demostrou moito descaro na súa estrea como branquiazul. Actuando desde calquera das dúas bandas, ou como dianteiro, participou en 25 encontros de Liga e nos dous do Playoff Exprés, marcando cinco goles, o último deles, precisamente, nas semifinais contra o CD Barco. Ademais, este ano, tamén tivo un papel destacado na Copa Deputación, na que anotou outros cinco tantos.
Tras superar os cen partidos disputados en Terceira División, en tan só tres campañas, agora tentará seguir acumulando experiencias e demostrando as súas capacidades na Segunda B.
Coa súa renovación xa son sete os xogadores que confirmaron a súa presenza na SD Compostela 20/21: Pato Guillén, Borja Rey, Álvaro Casas, Samu, Baleato, Gabri Palmás e Brais Abelenda.
