- O plantel branquiazul comezará os adestramentos en San Lázaro II dividido en dous grupos
- Yago Iglesias contará cos xogadores do primeiro plantel e sete canteiráns
Santiago de Compostela, a 24 de agosto de 2020.
A SD Compostela 20/21 xa ten data de regreso. O plantel branquiazul regresará aos adestramentos este próximo luns 31 de agosto. Os compostelanistas iniciarán deste xeito, no Campo Anexo San Lázaro II, a súa particular pretempada, a cal comeza nunha época estraña e aínda sen coñecer as datas oficiais do regreso á competición.
Os xogadores branquiazuis están citados para a matinal no Estadio Verónica Boquete para arrincar unha campaña ilusionante, a do regreso á Segunda División B. Esta volta ao traballo levarana a cabo divididos en dous grupos, o primeiro deles ás 10.15 horas e o segundo ás 11.15.
No plantel que inicia este camiño haberá dezaseis caras coñecidas, a dos futbolistas que lograron o ansiado ascenso en Balaídos, así como un corpo técnico que cumprirá a súa quinta campaña á fronte do proxecto. Ademais, tamén estarán presentes as tres caras novas, a expensas de pechar algunha última incorporación, así como sete futbolistas da canteira compostelanista.
Por tanto, saltarán ao céspede como xogadores de Segunda B Pato, Borja Rey, Saro, Sergio Pereira, Álvaro Casas, Soto, Jimmy, Joel, Samu, Baleato, Pablo Antas, Bicho, Josiño, Juampa, Hugo Sanmartín, Miki, Gabri Palmás, Brais Abelenda e Primo.
A eles acompañaranos os sete canteiráns, algún deles presentes tamén na preparación do playoff exprés. Repetirán o porteiro Iker Caballero, o lateral Yosi, o interior Manu Rivas e o dianteiro Christian, mentres que debutarán o mediapunta Remuiñán, quen xa adestrou ás ordes de Yago Iglesias ao longo da pasada campaña, e os recentemente fichados Roque e Axel Sánchez.
Comezará así unha tempada moi ilusionante na que os branquiazuis esperan darlle moitas alegrías á afección, logrando realizar unha boa campaña nunha nova categoría, a Segunda B.
