- Os santiagueses volveron ao traballo divididos en dous grupos
- A sesión dividiuse entre o ximnasio e o campo de xogo de San Lázaro II
Santiago de Compostela, a 31 de agosto de 2020.
A SD Compostela 20/21 emprendeu neste 31 de agosto de 2020 o seu camiño de volta á Segunda División B. Divididos en dous grupos, os branquiazuis volveron ao traballo, despois dun mes de descanso, para preparar o regreso á división de bronce do fútbol nacional.
A actividade arrincou ás 10.00 da mañá, hora á que estaban citados os membros do primeiro grupo. Ambas sesións tiveron unha duración aproximada dunha hora e cuarto, dividíndose o traballo entre o ximnasio e o campo de xogo do San Lázaro II, o cal amenceu parcelado polo corpo técnico.
En ambos casos, os xogadores branquiazuis arrincaron con traballo preventivo e de forza xeral no ximnasio do Estadio Verónica Boquete de San Lázaro. Posteriormente, na segunda metade, realizouse traballo de transferencia no campo, para terminar a sesión con rondos, rondos grandes e dúas conservacións.
Do mesmo xeito, a xornada serviu para vivir moitos reencontros despois das vacacións, así como para darlle a benvida aos novos integrantes do plantel branquiazul. Enfundáronse por primeira vez a indumentaria de adestramento do Compos Borja Rey, Joel e Juampa, pero tamén Roque e Axel Sánchez, fichados este mesmo verán para reforzar ao Xuvenil A de Liga Nacional.
