- Yago Iglesias destacou as boas sensacións do equipo no parón, o cal serviu para recuperar efectivos
Santiago de Compostela, a 20 de Novembro de 2020.
A SD Compostela viaxará mañá a terras ferrolás para buscar a súa segunda vitoria consecutiva da tempada, a primeira como visitantes. Os nosos tentarán que os tres puntos do derbi veñan para Santiago, despois das boas sensacións que deixou a estrea do marcador de triunfos no último duelo no fortín.
Baixas. A única baixa confirmada a día de hoxe é a de Hugo. Primo e Samu adestraron onte e hoxe co grupo e xa poden ir convocados. É unha moi boa noticia, a verdade. En canto ao resto do plantel están todos ok, polo que son boas noticias para finalizar a semana. Evidentemente, Samu vén dun período de inactividade longo e Primo dúas semanas, non estarán ao 100%, pero poderemos dispoñer deles.
Sensacións durante a semana. Os adestramentos ao longo da semana foron moi ben, o equipo está a demostrar que está a traballar moi moi ben, que todos poden participar en calquera momento e, sobre todo, dentro das variantes que temos, tentaremos escoller aos mellores para o partido.
O parón. O parón sentounos ben no aspecto físico e veunos ben despois dunha vitoria, para ter un descanso a nivel mental, que non físico, porque estivemos a traballar moi ben estas dúas semanas.
A primeira vitoria. O que necesitabamos era sumar de tres. As sensacións e a dinámica eran moi boas e o único que necesitabamos era plasmalo coa primeira vitoria. Ademais, dentro dese partido, apareceron dous goleadores, Miki e Bicho, que nos dan confianza a nivel colectivo e individual para eles.
O nivel do equipo. As sensacións son boas a nivel defensivo, pero co cómputo xeral do que fai o equipo. Sobre todo, o que é a nosa base, que é o atacar ben e estar o maior tempo posible en campo rival. A nosa idea é seguir na mesma liña que semanas anteriores.
O rival. É un desprazamento, imos a un campo moi complicado, cun equipo que este ano fichou e gañou en potencial físico, entendido non só con correr senón coa envergadura. Teñen xogadores de moitísima talla e, evidentemente, eles explotan moito ese potencial e teremos que adaptar a nosa idea e a nosa forma de xogo ao que cremos que nos imos a atopar.
Último enfrontamento. O espello que temos é o partido de hai dúas tempadas alí, no que sacamos un 0-0, fallando un penalti. Si é certo que o Racing na casa é un equipo moito máis protagonista, pero nin eles son os dese ano, nin nós tampouco. Cada partido, mesmo dentro da mesma tempada, cambian moito as ideas. Tanto no Compostela como no Racing os protagonistas van ser outros e iso vai marcar o partido. Evidentemente, esperámonos a un Racing moi agresivo, como os partidos que lle vimos esta tempada, e máis xogando na súa casa. Nós tamén temos os nosos puntos fortes e de aí temos que tentar sacar vantaxes.
O plan de partido. Temos claro o plan de partido que queremos e o que nos imos a atopar. Sabemos que o Racing na casa é un equipo que se fai moito máis forte, aínda que os resultados positivos foron fora da Malata. Nesa dinámica positiva que veñen, esperámonos un Racing agresivo e que quererá saír a polo partido desde o inicio.
Potencial do Racing. Sabemos o que temos diante, un equipo con moito potencial de cara ao gol, Joselu, David Rodríguez, Elsinho, Yeferson, Álex López, Dani Abalo. Os nomes dos xogadores do Racing son doutra categoría, pero xa vivenciamos esta tempada, e tamén en pasadas, que podemos competir e facelo moi ben contra calquera. O caso do Deportivo e do Guijuelo téñennos que servir de exemplo.
A Malata. A Malata é un campo moi parecido ao Vero Boquete de San Lázaro, por dimensións ou estado do terreo de xogo. O escenario, neste caso, é moi parecido ao noso. Van ter 150 persoas, non vai ser tan ruidoso como os 2.000 ou 3.000 que estarían en circunstancias normais, pero si que se fai notar o xogar fóra de casa, igual que os equipos rivais notan cando veñen ao Vero Boquete.
