- No último amigable ante o Fabril, once xogadores da base participaron no encontro
Santiago de Compostela, 29 de agosto de 2022
A ‘canteira picheleira’ tivo un gran protagonismo na pretempada da SD Compostela, un papel moi destacado que se pechou da mellor maneira, con once xogadores da base participando no último amigable, este pasado domingo contra o RC Deportivo Fabril.
Desde que se iniciou o traballo do novo Compos, ás ordes de Fabiano, moitos xogadores canteiráns foron os que pasaron polos adestramentos do primeiro equipo, algúns deles coa oportunidade de debutar en partido.
Neste sentido, esta última fin de semana, Kike, do filial, e Hugo Matos, do Xuvenil A, debutaron en partido oficial coa SD Compostela na final da Fase Autonómica da Copa RFEF. Ademais, o central do Sigüeiro disputou todo o encontro.
Pola súa banda, en Taboada, tiveron presenza no equipo Trillo, Dani Varela, Xoel, Alvarellos, Hugo Matos e Goris, do Xuvenil A do Compos; e Anxo, Ozores, Axel, Santi de Prado e Santi Taboada, do filial. Para culminalo, Santi de Prado, marcou o seu primeiro gol coa camiseta da SD Compostela.
Nestas seis semanas de traballo tamén tiveron presenza nos adestramentos e en amigables previos: Óscar Remuiñán e Yago, do Sigüeiro; e Iker Carril, do Xuvenil.
