- O Operador Móbil Virtual entrega o segundo agasallo da Composfest nas súas instalacións
Santiago de Compostela, 19 de outubro de 2022
O Operador Móbil Virtual galego Toxo Telecom (www.toxotelecom.com) é novo patrocinador da SD Compostela e, como benvida á familia branquiazul, entregará o segundo agasallo da Campaña de Abonados. As instalacións da compañía en Santo Domingo da Calzada 3 (Costa da Camelia) serán o punto de recollida dos 200 quentapescozos do Compos que se poñen ao dispor dos abonados neste mes de outubro.
Tras o éxito do primeiro agasallo, ábrese o prazo este xoves 20 de outubro para a recollida do segundo obsequio. Igualmente, entregaranse por orde de recollida e para iso será necesario presentar o abono propio e o DNI. Só se habilita para maiores de idade.
O horario da tenda de Toxo Telecom é de 10.00 a 13.30 horas e de 17.00 a 20.30 horas, de luns a venres. Pásache por ela mañá ou pasado e acode ben protexido do frío o domingo ao Vero Boquete.
TOXO TELECOM. Arraigado en Ribeira, Toxo Telecom é un OMV (Operador Móbil Virtual) creado en 2018 e que actualmente está repartido por toda a xeografía galega, así como noutras comunidades e en cidades de Europa.
A nova compañía patrocinadora do club ofrece servizos de telefonía móbil e fixa, internet por fibra óptica e TV. En móbiles, dispoñen de servizo de tripla cobertura (Yoigo/Orange/Movistar), polo que garanten unha boa calidade de conexión no 99% do territorio nacional. En canto a fibra óptica, teñen asinados convenios con todos os grandes operadores e fibras neutras, polo que dispoñen da maior pegada de fibra do país.
A maiores, contan tamén co servizo de alarma con aviso á policía, prestado pola empresa de Santiago Seguridade A1.
