- Álvaro Casas analizou o derbi contra o Coruxo en Deltacargo, o seu patrocinador e do encontro desta fin de semana
Santiago de Compostela, 20 de outubro de 2022
Álvaro Casas, analizou este mediodía, na sede de Deltacargo, a previa do derbi contra o Coruxo. O central, reconvertido a centrocampista neste inicio de curso, quixo destacar a importancia do encontro deste domingo ás 12.00 no Vero Boquete. O capitán do equipo quere sumar o triunfo para reverter o mal grolo de Lugo.
A rolda de prensa tivo lugar na sede de Deltacargo, o novo patrocinador oficial de Álvaro Casas e tamén do derbi que mide á SD Compostela ante o cadro vigués.
Derrota en Lugo. Foi un golpe duro, pero xa estamos a pensar no seguinte partido. Cando perdes no último minuto amola moito, este ano levamos tres así, temos que seguir traballando e centrarnos niso, en non perder a concentración. Doe moito cando estás a traballar todo o partido e que se vaia nos últimos catro minutos. Perdemos uns bos puntos esta fin de semana e tamén nos pasou contra o Oviedo e o Langreo en casa, polo que é un dos puntos que temos que mellorar.
Sistema de cinco defensas. O míster tivo que cambiar o sistema polas circunstancias, pero o equipo competiu ben, ao adestrador gustoulle e apostou por continuar con iso. Agora que recuperamos xente, prefiro ver o vaso medio cheo, porque un equipo que sabe xogar con varios sistemas e con diferentes plans, crecerá. Recuperamos xente e esta fin de semana é moi importante conseguir os tres puntos para non descolgarnos da zona alta, que é o noso obxectivo.
Xogar de mediocentro. Mentres estea no campo, estou cómodo. É unha posición que coñezo, hai anos que non xogaba aí, pero cheguei ao Compos como centrocampista, aínda que despois pasei a xogar de central. Desde logo, non estou incómodo nesa posición.
O Coruxo. Destaco o seu grupo, porque leva bastantes anos xuntos. Ten un gran bloque, o adestrador xa estivera antes e o ano pasado colleu ao equipo en descenso e púxoo en playoff. É xente que traballa moi ben e fixo fichaxes como Añón e Luismi, que están a meter goles, e atrás son sólidos, saen co balón xogado e se levan tantos anos na categoría, por algo é. É un rival duro.
Partido que lle interesa ao Compos. Interésalle un partido que gañe. Estamos a traballar con varias hipóteses de como poden xogar eles ou como xogar nós. Dependendo do sistema polo que aposte o míster e dos xogadores, verase un Compos dun modo ou doutro.
