- O partido disputarase para o domingo ás 17.00 horas no Vero Boquete
Santiago de Compostela, 16 de xaneiro de 2023
Para a estrea da segunda volta no Estadio Verónica Boquete de San Lázaro, este próximo domingo, ás 17.00 horas, contra o Real Oviedo Vetusta, a SD Compostela saca unha promoción para os seus abonados e peñas, co obxectivo de lograr o maior ambiente posible nas bancadas, un apoio crucial para conseguir os tres puntos.
Con este obxectivo, todos os abonados e abonadas do club poderán retirar, a partir de mañá martes, entradas a metade de prezo para o partido. Estarán dispoñibles para todos os rangos de idade e para ambas bancadas.
As entradas poderán ser retiradas tanto na Oficina do Club, ata o venres, como na Tenda Oficial da Rúa da Raíña, ata o sábado.
Ademais, en agradecemento por fomentar, manter e mellorar a representatividade e a proxección pública do club en todos os ámbitos, as peñas do club poderán retirar invitacións gratuítas para o encontro. Actualmente están rexistradas sete: Fonte Sequelo, Fende Testas, Bancada Picheleira, Irmandade Picheleira, Gato Félix (unión de Os Dous, Lingua Azul, Bótalle Outra e Frente Gaias), Curva Branquiazul e Os Presedo.
Deste xeito, recompénsase o esforzo realizado polas asociacións de afeccionados rexistrados no rexistro interno do club, os cales levan a cabo actos culturais, sociais e gastronómicos portando o escudo e as cores da SD Compostela. Con estes eventos logran atraer a novos simpatizantes e crean comunidades cada vez máis amplas.
