- A SD Compostela quere prolongar o seu bo momento, na casa, contra o Zamora
Santiago de Compostela, 16 de febreiro de 2023
A SD Compostela buscará prolongar o seu bo momento de forma e resultados este sábado, na casa, contra o Zamora. Os branquiazuis, tras encadear dous triunfos seguidos, queren lograr o terceiro contra un rival duro, que traerá como técnico ao exentrenador compostelanista Yago Iglesias.
Os nosos tentarán repetir a experiencia da primeira volta, aínda que sabendo que será moi complicado. Por iso, Fabiano espera un equipo ordenado e intenso para poder sacar os tres puntos.
Estado do plantel. Algún ten algunha molestia, pero espero poder contar con eles. Quédanos o adestramento de mañá e sábado para decidir, pero espero contar con todos.
Encontro novo respecto á primeira volta. El terá as súas armas, explorará os nosos puntos débiles, nós os seus, haberá axustes, pero ningún cambiará o sistema. Ultimamente, os equipos aos que nos estamos enfrontando están a cambiar os seus sistemas. Algúns presionaban con dous e connosco fano cun, equipos que atacan dunha maneira e cámbiana contra nós. Iso é sinal de que estamos a facer as cousas ben, pero temos que seguir competindo ben, como equipo, ordenados e intensos. Loxicamente, espero algún cambio do Zamora e eles tamén imaxinarán que teremos algunha maneira de xogar para atacar as súas debilidades. O sábado verémolo.
Un partido bonito. Son dous bos equipos. Alí gañamos ben, pero foi un partido difícil, como todos. Loxicamente, será outra historia, será outro partido. Están noutra dinámica, nós tamén. Será un partido igualado, como está a ser toda a liga.
Un rival que domina a posesión. O Raio Cantabria, o Valladolid e eles mesmos son equipos aos que lles gusta ter a pelota. É normal, porque é un equipo ben adestrado, con bos futbolistas, con orzamento grande e teñen que estar metidos aí. A principio de tempada xa contabamos con eles e non está a ser distinto. Empezaron mal, recuperaron, están a xogar ben e a xente que veña verá un bo partido. Dous equipos buscando a vitoria, o que é bo para os afeccionados.
Reforzos do Zamora. Contrataron a Carlos, do Bergantiños, que xa empeza a marcar goles, o outro fixo dous, un xogador de moita calidade. Sinceramente, vexo un equipo moi forte en todas as liñas e temos que ser un equipo ordenado e intenso. Loxicamente, eles fixeron fichaxes para mellorar o equipo, fixérono, por iso que os resultados lles están chegando.
