- O veterano porteiro conta cunha gran experiencia no fútbol nacional e firma ata final de tempada
Santiago de Compostela, 24 de febreiro de 2023
Javi Jiménez Camarero (Logroño, 08/06/1987) é novo xogador da SD Compostela. O veterano porteiro, que se atopaba sen equipo, firma ata final de tempada. Con experiencia en Primeira e Segunda División, o arqueiro chega para suplir a baixa de Pato Guillén.
O novo porteiro do Compos conta cunha dilatada traxectoria profesional no fútbol nacional. Aos seus 35 anos, destaca por ser un porteiro de grandes calidades, con gran experiencia, moi seguro baixo paus e con capacidade para sacar o balón xogado. Por iso, decidiuse afrontar a súa fichaxe.
O veterano meta chega tras unha última etapa no Surkhon Termiz da Primeira División de Usbequistán, a campaña pasada.
Anteriormente, fixo carreira en España. Tras saír da canteira do Alavés, pasou polo Valladolid, Real Murcia, Levante, Alcorcón, Elche, Huesca, UCAM Murcia, Atlético Sanluqueño, Algeciras e Salamanca UDS.
Dada esa traxectoria, acumula un gran currículo no fútbol nacional. Conta con dous encontros disputados en Primeira División, nas filas do Levante; seis de Copa do Rey, con Alcorcón, Levante e Murcia; 130 en Segunda División, con Valladolid, Murcia, Alcorcón e Elche, dous deles de ascenso a Primeira. Do mesmo xeito, das súas últimas etapas, sumou outros 58 encontros na Segunda División B.
Con esa gran bagaxe chega a Compostela para reforzar a portería branquiazul e competir por un posto no once con Borja Rey. Javi Jiménez aterrará na capital galega este próximo domingo e poñerase ás ordes de Fabiano, tras superar o recoñecemento médico, o luns, co obxectivo de estar dispoñible para o derbi contra o Lugo B.
