- Convida a quen queiras e presentando o teu abono as entradas contra o Lugo B sairanche a 5€
- Habilitado para calquera bancada e sen límite máximo: saca todas as que necesites con desconto
Santiago de Compostela, 27 de febreiro de 2023
Despois de sumar senllas vitorias nas dúas últimas saídas, a SD Compostela necesita dar continuidade ao seu bo momento no Vero Boquete. Os partidos na casa son de vital importancia para seguir coa persecución do líder e ampliar a vantaxe cos rivais directos. Por iso, o club saca outra promoción de entradas a maiores para abonad@s.
Todos os abonad@s, ademais de acceder ao derbi do domingo co seu abono, poderán retirar tamén as entradas que desexen, sen límite, por un prezo reducido de 5€. Para calquera das dúas bancadas e para todos os rangos de idade. A única condición é a de presentar o abono á hora de comprar as entradas.
Deste xeito, o obxectivo é o de xerar o maior ambiente posible para o importante derbi, domingo ás 12.00, contra o Lugo B.
Neste tramo da tempada, cada vitoria resulta crucial, polo que o apoio da afección, especialmente no Vero Boquete, é clave. Por tanto, búscase que cada abonad@ poida convidar a familiares ou amigos, quen pagarán un prezo moi reducido para acceder ao Estadio.
As entradas con desconto poderán ser retiradas a partir de mañá martes. Estarán dispoñibles na Oficina do Club, ata o venres; na Tenda Oficial da Rúa da Raíña, ata o sábado; e tamén nos despachos de billetes do Vero Boquete, o propio domingo desde unha hora antes.
