- O encontro serviu para dar conta da actualidade do club e para presentar aos novos socios
Santiago de Compostela, 14 de marzo de 2023
O Hotel Oca Porta do Camiño volveu acoller a segunda reunión da directiva da SD Compostela cos seus abonados e abonadas. Os seguidores branquiazuis presentes participaron nun encontro moi enriquecedor no que se deu conta da actualidade do club, con mención destacada para a presentación dos novos socios.
O presidente do club, Juan Carlos Rodríguez Gesto, foi o encargado de abrir o acto, cunha breve exposición da actualidade branquiazul. O presidente pasou revista ao momento deportivo, económico e social, detallando a situación vivida o pasado mes de decembro, coa incorporación de dezanove novos socios á entidade. Nese sentido, presentou a Ignacio Calles, en representación do devandito grupo asociado.
Precisamente, o empresario do mundo da tecnoloxía e profesor de Universidade, tomou a palabra para presentar aos abonados o proxecto que lidera Antonio Agrasar, quen, apuntou, está “moi comprometido” con el. Xunto a el destacou a figura de Esteban Granero, exxogador “cun gran perfil empresarial”, tachou, e que, xunto a Ignacio e Antonio, desenvolven interesantes proxectos relacionados coa tecnoloxía e o deporte.
Xunto a eles, sitúanse outras dezaseis persoas, conformadas por xente de confianza e próximas aos tres primeiros, pero tamén outras que achegarán “ferramentas que serán necesarias para o desenvolvemento futuro do club en todas as áreas e ámbitos”. Entre eles non se atopa, ata o momento, Borja Iglesias, aínda que, como ben explicou Ignacio Calles, a súa decisión aprazouse no tempo, dado o ruído que se xerou durante o pasado mes de decembro.
Así mesmo, dentro do seu discurso aos seguidores, Ignacio Calles destacou que a súa chegada ao club prodúcese coa misión de desenvolver “un proxecto a longo prazo”, que estea cociñado paseniñamente e sobre unhas bases ben asentadas. Por iso, neste momento, reiterou, “o obxectivo principal é o aspecto deportivo”, coa misión de que o plantel poida render ao máximo, co obxectivo de pelexar polo ascenso á Primeira RFEF.
Nese plan, o portavoz do grupo de socios, tamén fixo mención á conversión do club en Sociedade Anónima Deportiva, un reto para os próximos anos que, en primeiro lugar, require un esforzo importante, tanto a nivel de xestión interna como económico.
Con esa misión, os novos asociados están a traballar de xeito conxunto coa nova directiva para executar este proceso canto antes. Nesa liña, unha vez se ordene todo a nivel interno, executaranse os pasos necesarios para abrilo á cidade, desde autoridades e empresas ata a todos os afeccionados e cidadáns que así o desexen. Aínda que non se quixo marcar prazos, ante a pregunta dun abonado, sinalou que se poñen como obxectivo ter o proceso encamiñado a finais da próxima tempada.
Por último, dentro das cuestións, tamén houbo tempo para explicar a situación respecto á marca, o papel da Fundación e a posible entrada dos novos socios na directiva.
