- Mario Rodríguez pediu o apoio da afección para este gran derbi no Vero Boquete, patrocinado por Ulla Oil
Santiago de Compostela, 30 de marzo de 2023
Nas instalacións de Ulla Oil, o seu patrocinador oficial e do derbi deste domingo, Mario Rodríguez valorou o gran partido que enfrontará ao Compos, no Vero Boquete, contra o líder, un Arenteiro intratable.
O autor do tanto que deu a vitoria aos nosos no Carballiño falou da importancia de sumar o triunfo neste partidazo, xa non só polos tres puntos importantísimos, que tamén, senón pola golpe anímico que supoñería, tras varias semanas sen sumar o triunfo. Para iso, o atacante barcelonés pediu o apoio da afección.
Gañar outra vez ao Arenteiro. Esperamos ter a receita para superalos. Para nós é un partido máis, igual de importante que o resto. En todo caso, ten o incentivo de ser contra o líder, un equipo ao que fomos quen de gañarlles alí. Estamos moi motivados e con moitas gañas de sacar os tres puntos, que os necesitamos, sobre todo, sendo na casa e coa nosa xente.
Clave para marcar gol. Penso que a clave está en nós mesmos, en ter o día, estar inspirados e ter as ideas claras. Creo que estamos a adestrar moi ben, preparando o ataque, porque estas últimas semanas está a custarnos, aínda que tamén é certo que nas segundas voltas os partidos son máis complicados e máis pechados. A clave está en nós, que teñamos un bo día e estou convencido de que así será. Estou convencido de que poderemos facer, polo menos, un gol e oxalá sexa para gañar tamén.
Apoio da afección. Para nós é moi importante que a xente veña e que nos apoie, sobre todo agora, co que pasou estas semanas. Polos resultados que estamos a ter é cando máis os necesitamos e espero que veña a máxima xente posible a animarnos e apoiarnos para conseguir os tres puntos.
Posición no campo con Cardeñosa. Varía o que teño que facer dentro do campo e a posición na que estou. Agora sigo estando arriba, pero un pouco máis atrasado e escorado. En todo caso, a miña mentalidade non cambia, o que busco é o ben do equipo, xa sexa asistindo ou facendo gol, que é o meu traballo. O traballo que estamos a facer é para iso, para asimilar os novos conceptos e espero que o domingo poida saír todo o mellor posible.
Rendemento individual esta tempada. Estou contento. Si que é certo que estas últimas semanas está a custarme un pouco máis. Cada partido é un mundo, levo bastantes minutos acumulados e iso tamén pesa un pouquiño, pero estou tranquilo. A tempada é boa, sobre todo, a nivel colectivo, que é o importante, e espero que de aquí ao final poidan ir as cousas ben, tanto a nivel individual como grupal, e que podamos cumprir o obxectivo que temos, que é o máis importante.
