-
O dianteiro analizou a última xornada no Restaurante San Jaime, o seu patrocinador oficial e do importantísimo duelo ante o Marino de Luanco
Santiago de Compostela, 10 de maio de 2023
Nas instalacións do Restaurante San Jaime, na zona vella compostelá, Allyson analizou esta tarde como chega o Compos á última xornada de liga. Con vantaxe para conseguir a clasificación para o playoff, os nosos queren dar ese último paso, este domingo, diante dos seus, ante o Marino de Luanco.
Por iso, adiantou, o equipo está mentalizado e convencido para conseguir o obxectivo. Os nosos están a traballar duro para sumar o triunfo e poder celebrar esa ansiada clasificación para a fase de ascenso. Ademais, o ariete pediu tamén o apoio do público, debido a que este é un partido para que a afección leve polo aire ao Compos ata a vitoria.
Nesta liña, o club levou a cabo unha promoción para levar o máximo público posible ao estadio. As entradas custarán cinco euros para os adultos, en ambas bancadas; os menores de idade entrarán gratis, previa retirada de invitación; e todos os locais de hostalería que colaborar co club (uns cincuenta) recibiron vinte invitacións cada un para poder repartir cos afeccionados que así o desexen. Con todo iso, espérase unha gran entrada para a gran cita. “Todos ao Vero Boquete”, é o lema.
Declaracións de Allyson no San Jaime.
Estado físico. Totalmente recuperado e listo para afrontar esta semana.
Sensacións do equipo. Creo que o equipo está moi ben. O outro día foi unha pena, porque creo que en quince minutos perdemos o partido, porque logo tivemos oportunidades de remontar, polas sensacións do encontro. Por iso, creo que o equipo chega moi ben para afrontar este último partido de liga.
Como se afronta un partido como este. Temos que mirar para nós mesmos. Temos que saír desde o minuto un, na casa, a gañar o partido, sen reviravoltas, sen pensar no empate e sen pensar nos demais. Pensar en nós mesmos e saír a gañar o encontro.
Importancia do apoio da afección. Sen dúbida, a afección é fundamental nestes partidos. A súa axuda nótase e cando o campo está a rebentar é un plus para nós.
Un encontro de playoff. É unha final. Non nos vale outra que gañar para estar en postos de playoff e creo que debemos centrarnos en nós mesmos. Facer unha semana moi boa para chegar moi ben ao encontro.
O rival. Eles non se xogan nada e a ver en que plan veñen. Pero o dito, nós debemos enfocarnos en nós mesmos, a pensar en adestrar ben esta semana e estar todos dispoñibles para saír o domingo a gañar.
Tempada individual. Foi unha tempada bastante mala a nivel persoal. Moitas lesións, moitos problemas… pero estamos ao final e non é cuestión de pensar en min, nin moito menos. Temos que pensar no equipo, en estar dispoñible e axudar en todo o posible ao equipo, en todos os aspectos. Teño que axudar en todo o que sexa posible ata acabar a tempada, que oxalá sexa cun ascenso.
