-
O Celta impúxose por 0-3 a un gran Compos que segue coa súa pretempada
Santiago de Compostela, 8 de agosto de 2023
A SD Compostela e o RC Celta disputaron esta tarde, no Vero Boquete de San Lázaro, un intenso Memorial Antonio Bermúdez, patrocinado por Cobre San Rafael, que levou o cadro olívico. Un encontro especial, para lembrar a un amigo do club e que permitiu ver en acción, de novo, a un equipo de Primeira División en Compostela.
O Vero Boquete respondeu ante a visita dun gran rival ao estadio compostelán, poboando as bancadas e dando colorido a este encontro especial. Despois de dez anos, Compos e Celta volvían verse as caras.
Na primeira parte, baixo unha intensa calor, o Compos partiu sen medos, querendo o balón e con intención tamén de someter ao rival. Con todo, o Celta, cunha presión elevada, tamén quería facer dano roubando en campo contrario.
Cunha formulación atrevida por ambas partes, avisou o Celta por mediación de Paciencia, nun man a man que salvou á perfección Pato. E á segunda, tras unha gran asistencia de Bamba, Aspas si resolvería a acción, poñendo o primeiro no luminoso.
Con estas ocasións destacables e algún achegamento do Compos por área rival, o encontro chegouse ao descanso coa mínima vantaxe celeste.
Á volta dos vestiarios, cun equipo renovado no Celta, os vigueses darían dous golpes máis, primeiro, cun gol de Strand Larsen e despois con outro de Luca de la Torre.
Con 0-3 no marcador, Manel Menéndez tamén decidiu mover o banco, dentro do seu propósito de repartir minutos nesta semana tan intensa con tres amigables.
Con pernas frescas, o Compos mesmo avisaría nunha gran acción por banda, cun centro raso de Jaime Santos ao que non chegou Antón de Vicente por moi pouco.
En todo caso, o marcador xa non se moveu, finalizando o encontro co 0-3. Pechouse así unha gran xornada no Vero Boquete.
FICHA TÉCNICA
SD COMPOSTELA: Pato Guillén; Pep Caballé (Riki Mangana, m.63), Kike (David Soto, m.63), Álvaro Casas (Pablo Crespo, m.63), Martín (Sálamo, m.63); Pablo Antas (Antón de Vicente, m.57), Xoel (Landeira, m.63), Fer Beltrán (Jordan, m.63); Hugo Matos (Parapar, m.63), Juampa (Dani Varela, m.63) e Manu Barreiro (Jaime Santos, m.46).
RC CELTA: Koke; Kevin, Aidoo (Unai, m.46), Fontán (Carlos Domínguez, m.46), Manu Sánchez (Cervi, m.46); Tapia (Fran Beltrán, m.46), Dotor (Sotelo, m.46); C. Pérez (Miguel Rodríguez, m.46), Iago Aspas (Luca de la Torre, m.46), Bamba (Gabri Veiga, m.61); e Paciencia (Strand Larsen, m.46).
GOLES: 0-1: Aspas, min.30; 0-2: Larsen, min.48; 0-3: Luca de la Torre, min.56;
ÁRBITRO: Muñiz Ruiz (Galicia).
INCIDENCIAS: Estadio Verónica Boquete de San Lázaro (Santiago de Compostela). VII Memorial Antonio Bermúdez disputado ante 4.000 espectadores.
