Santiago de Compostela, 15 de outubro de 2023
A Sociedade Deportiva Compostela e Manuel Castiñeiras chegaron a un acordo esta tarde para poñer fin á súa relación contractual. O club e o xa exdirector deportivo acordaron a separación dos seus camiños polo ben da entidade.
Desde o club, co obxectivo de tentar retomar a boa senda deportiva, trasladóuselle a Manu Castiñeiras, á finalización do partido, a posibilidade de pechar o seu capítulo como director deportivo, decisión que foi aceptada.
Desde a SD Compostela queremos trasladar a Manu Castiñeiras o noso máis sincero agradecemento por todo o seu traballo, dedicación e esforzo incansable para que o proxecto do Compos prosperase.
Manu Castiñeiras é un emblema desta entidade, tanto polo seu pasado como xogador como polo seu labor desde os despachos. Neste sentido, o seu traballo desde 2016 permitiu que o club puidese continuar adiante e que recuperase impulso durante todos estes anos, nos que se viviron grandes momentos deportivos.
Por todo iso, esperamos que esta separación sexa un punto nun camiño no que nos volvamos atopar.
Moitas grazas por todo, Casti.
Víctor Pazos, secretario técnico de forma interina
Co adeus de Manu Castiñeiras, a dirección deportiva da SD Compostela será asumida de forma interina por Víctor Pazos. O coordinador da Canteira Picheleira será o secretario técnico do club desde este luns, mentres o Compos traballa na procura dun substituto.
