-
Jorge Sálamo disputará con España un torneo de clasificación para o Campionato de Europa
Santiago de Compostela, 17 de outubro de 2023
Un premio máis que merecido a un traballo sensacional. Jorge Sálamo Candal, do Xuvenil A da SD Compostela, foi convocado coa Selección Española Sub-17 para o minitorneo de clasificación do Campionato de Europa, que se disputará do 22 de outubro ao 1 de novembro en Malta.
O gran rendemento mostrado por Jorge Sálamo neste inicio de competición, así como a súa evolución nestes últimos anos, chamou a atención dos técnicos da Selección para contar con el neste torneo. Unha chamada e unha convocatoria que tamén son históricas para a Sociedade Deportiva Compostela.
Cabe destacar que Jorge Sálamo, a pesar de ser xuvenil de primeiro ano, é unha das pezas destacadas da defensa do Xuvenil A da SD Compostela. Xogou coma titular as sete xornadas que se levan disputadas na División de Honra, mostrando un gran nivel, posto que o Compos é o equipo menos goleado do Grupo 1. Esta faceta é clave para estar no liderado da liga, compartido co RC Celta, con 19 puntos de 21 posibles.
Ademais, Jorge Sálamo, desde o inicio da pretempada, atópase en dinámica do primeiro equipo da SD Compostela. Realizou toda a preparación estival co Compos, participou nos partidos amigables, debutando con 15 anos, e segue adestrando diariamente co equipo de Segunda RFEF.
Por todo iso, a chamada da Selección Española Sub17 é un premio máis que merecido. Agora poderá gozar dunha experiencia única na que, estamos seguros, seguirá demostrando o seu gran nivel.
No Torneo de Malta, Jorge Sálamo competirá con España contra as seleccións de Malta (25.10), Macedonia do Norte (28.10) e Eslovaquia (31.10).
Parabéns e moita sorte, Jorge!
