-
Fiz ven de acadar o ascenso á División de Honra co Cadete A do Compos
Santiago de Compostela, 13 de xuño de 2024
Fiz Rodríguez Carballo é o novo adestrador do Xuvenil A da SD Compostela para a Tempada 2024/25. O técnico lucense, que ven de ascender co Cadete “A” a División de Honra, tomará as rendas do equipo da Canteira Picheleira o ano que vén, tras unha tempada histórica na que acadaron un moi meritorio quinto posto.
Desta maneira, continuarase traballando coa mesma idea que vén aplicando o club nestes últimos anos e que tantos bos resultados está a mostrar. O obxectivo continuará sendo facer un bo papel en División de Honra, así como formar xogadores para o filial e o primeiro equipo do Compos.
O proxecto do Xuvenil A estará liderado por un adestrador que coñece a casa dende o 2018, ano no que chegou para adestrar no Xuvenil B e á campaña seguinte, fíxose cargo do Zona Vella, filial branquiazul por aquel entón. Nesta última tempada, acadou o ascenso co Cadete “A” á División de Honra, amosando moita solidez ao longo da tempada, rematando a competición na 1ª posición.
Fiz chegou a traballar co primeiro equipo, sendo analista do corpo técnico que comandaba Yago Iglesias e segundo adestrador de Rodri, no curso 21-22.
A maiores, Fiz conta con experiencia en bancos de Terceira División e da Preferente Norte, categoría na que competiu co filial actual do Compos, o Sigüeiro F.C. Estivo ligado ás categorías inferiores do Club Deportivo Lugo e dirixiu á SD Sarriana, UD Pastoricense e Ribadeo FC.
Benvido e moita sorte, Fiz!
