-
O Sigüeiro, recentemente campión da Copa do Sar, seguirá actuando como filial do Compos, sendo un trampolín para os canteiráns
Santiago de Compostela, 12 de xuño de 2024
O Sigüeiro FC seguirá sendo o filial da SD Compostela unha tempada máis. Froito dos grandes resultados logrados nestas tres campañas xuntos, ambos clubs decidiron renovar o seu convenio de colaboración. Deste xeito, o conxunto de Oroso, que milita na Preferente Galicia e que recentemente se converteu en campión da Copa do Sar, seguirá actuando como filial do Compos.
Este acordo supón unha gran noticia, xa que o Sigu permitiu a moitos xogadores da Canteira Picheleira dar o salto ao fútbol profesional, tendendo unha ponte entre a idade xuvenil e o primeiro equipo da SD Compostela.
Nesta liña, o Sigüeiro foi un trampolín nestas tres últimas tempadas para os xogadores mozos branquiazuis. Moitos deles alternaron a súa presenza no filial con participación nos adestramentos do primeiro equipo e mesmo gozaron de minutos co Compos. Só nesta última campaña, 6 xogadores do filial disputaron encontros na Segunda RFEF.
Ademais, cabe destacar os exemplos de Roque, Kike e Hugo Matos, futbolistas da casa que deron o salto ao primeiro plantel branquiazul desde o conxunto orosano.
Do mesmo xeito, este convenio tamén reforzou ao Sigüeiro, como demostran as súas últimas campañas no Grupo Norte da Preferente Galicia. O filial nutriuse nestes anos dos principais xogadores da Canteira Picheleira, futbolistas que tiveron un papel moi destacado no club, como demostran os dous cursos nos que pelexaron polo ascenso a Terceira RFEF.
Especial mención require esta última tempada, na que o Sigu quedou a un paso do segundo posto, pelexando ata as últimas xornadas polo salto de categoría. Un brillante rendemento que se coroou, este pasado domingo, co terceiro título para a entidade da Copa do Sar.
Por tanto, estamos seguros de que esta prolongación do acordo seguirá traendo grandes éxitos para ambos. Seguiremos gozando no Vero Boquete de futbolistas do filial e de xogadores da Canteira Picheleira no Sigüeiro.
Para pór a rúbrica a esta continuidade da colaboración, asinaron o acordo Miguel Fernández, xerente da SD Compostela; e Antonio Liñares, presidente do Sigüeiro FC.
