-
Iago Domínguez, porteiro vigués de 22 anos, chega desde o Mirandés e firma por unha tempada
Santiago de Compostela, 16 de xullo de 2024
Iago Domínguez Rodríguez (Vigo, 22/11/2001) é novo porteiro da SD Compostela para a Tempada 2024/25. O arqueiro galego de 22 anos, con experiencia na Segunda División B, chega desde o filial do Mirandés e firma por unha campaña.
Iago Domínguez é un gardameta moi completo, cun gran xogo de pés e enormes reflexos baixo paus. Canteirán do RC Celta, onde pasou 11 anos, conta cunha gran proxección futbolística, un nivel que o levou a debutar na Segunda B. Ademais, chega coa experiencia de estar a adestrar en dinámica dun equipo de Segunda División.
Por todo iso, a dirección deportiva da SD Compostela decidiu afrontar a súa fichaxe para a Tempada 2024/25, completando unha gran dupla baixo paus xunto a Rabanillo.
A Compostela, Iago Domínguez chega tras dúas tempadas no Mirandés, nas que liderou a portería do filial e foi terceiro porteiro do primeiro equipo. Neles, compaxinou o traballo con ambos conxuntos, adestrando diariamente e sumando máis dunha decena de convocatorias co equipo de Segunda División e disputando 57 partidos, entre ambos anos, na Terceira RFEF.
Anteriormente, Iago creceu na base do Celta, superando categorías desde benxamíns ata o filial, co que debutou na Segunda División B, ademais de estar citado tamén en varios encontros do primeiro equipo en Primeira División. Pechou a súa etapa en Vigo tras once anos na Madroa asinando no Arenteiro, co que debutaría na Segunda RFEF e na Copa do Rei, un curso no que disputou cinco encontros, na que foi a súa última experiencia en Galicia.
Polo tanto, coa súa fichaxe polo Compos, Iago Domínguez regresa á súa terra natal para continuar coa súa proxección futbolística. Con moita ilusión e moitas gañas, mañá xa iniciará a pretempada cos seus novos compañeiros.
Benvido e moita sorte, Iago!
