-
O equipamento acibeche fai emblema dos oficios que definen á cidade
Santiago de Compostela, 7 de agosto de 2024
Os oficios de pratería e acibechería forman parte da esencia mesma da cidade de Compostela. Sendo gremios que levan presentes na cidade desde a súa fundación, anteriores á propia Catedral, atópanse indisolublemente unidos á personalidade da cidade e do Camiño de Santiago. Constitúen un emblema identitario, un orgullo de cidade.
A SD Compostela, como símbolo deportivo da cidade, e club que leva suscitado as maiores mobilizacións sociais de Santiago, e o gremio que agrupa a asociación de “Ourives de Compostela”, poñen en marcha un proxecto de posta en valor destes oficios intrinsecamente composteláns, cunha estratexia de difusión cultural e deportiva.
Con tal finalidade, póñense en marcha diversas iniciativas, encabezadas por un equipamento oficial da S.D. Compostela para a tempada 2024/25: a camiseta acibeche. Esta será de cor acibeche (negro e negro brillante).
Co denominado equipamento acibeche, a SD servirá de escaparate e promoción dos oficios do gremio. Esta será a utilizada como segunda camiseta do equipo para a Tempada 2024/25, a cal será tamén vestida polos nosos nun dos partidos que disputaremos no estadio Vero Boquete de San Lázaro.
A camiseta inclúe de maneira visible un símbolo habitual das obras dos acibecheiros como é unha cuncha de vieira.
Está xa á venda nos puntos oficiais habituais do club, acompañada da pertinente explicación do seu deseño, e dun díptico explicativo dos oficios propios dos ourives. Ao mesmo tempo, cada comprador da camiseta oficial recibirá unha peza de acibeche en bruto.
Isto reforzará o coñecemento da acibechería entre os visitantes, ademais de incrementar o valor simbólico e identificativo do oficio entre os propios afeccionados santiagueses.
Dentro do proxecto, en cinco dos partidos oficiais que o primeiro equipo da SD Compostela dispute fóra de Galicia, a visita deportiva do Compos irá acompañada, o día de partido, dunha exhibición de acibechería na praza maior da respectiva cidade, moi probablemente Valladolid, Santander, Ávila, Salamanca e Avilés.
Nas devanditas exhibicións, os visitantes recibirán un recordo de acibeche, ao mesmo tempo en que se distribúen milleiros de exemplares nas feiras internacionais de turismo celebradas en Madrid, Barcelona, Bilbao ou Valladolid no pasado ano 2023.
Deste xeito, coa equipación acibeche, lograrase un impacto promocional da cidade, da provincia e de Galicia con alta permanencia no tempo, máis aló de accións puramente promocionais.
A iniciativa é posible grazas ao apoio de tres Administracións: a Axencia de Turismo de Galicia, a Deputación provincial e o Concello de Santiago.
No acto de presentación da camiseta, nun taller de acibechería da Praza da Inmaculada, Enrique Fink mostrou o orgullo que supón “que o Compos faga seu a cor do acibeche, para ser embaixador da cidade e dun símbolo tan picheleiro. Continuamos implantando o Plan estratéxico aprobado en 2019 para salvar estes oficios, e iniciativas como esta son de enorme relevancia para nós, polo que supoñen de difusión e posta en valor. Necesitamos incorporar novas vocacións, e tamén que o mercado demande un produto tan simbólico para Compostela”.
Pola súa banda, Miguel Fernández, xerente da SD Compostela, destacou que “cando nos fixeron a formulación desde o gremio, non puidemos dicir que non. O Compos ten que ser un estandarte da cidade, e poucas cousas son máis picheleiras que os ourives. Estamos moi ilusionados coa iniciativa, e estamos convencidos de que será un éxito”.
Ao acto de presentación asistiron o director da Axencia de Turismo de Galicia, Xosé Manuel Merelles; o vicepresidente da Deputación provincial da Coruña e responsable de Turismo, Xosé Regueira; e a tenente de alcaldesa do Concello de Santiago, María Rozas; así como a concelleira de Turismo, Miriam Louzao.
