-
O Compos xa coñece a súa folla de ruta para a Tempada 2024/25 no Grupo 1 da Segunda RFEF
Santiago de Compostela, 23 de xullo de 2024
A SD Compostela xa coñece a súa folla de ruta para a Tempada 2024/25 no Grupo 1 da Segunda RFEF. Os nosos terán un inicio de altura, con dous partidazos contra o Numancia e o Pontevedra, nunha liga que arrincará a fin de semana do 31 de agosto e 1 de setembro.
Serán nove intensos meses de competición, nunha liga que se presume apaixonante e á que os nosos esperan chegar en plena forma. Para iso, iniciaron xa unha intensa pretempada, con sete semanas de traballo estival.
Como o curso anterior, o Compos iniciará a liga como visitante e farao co desprazamento máis longo da tempada. Os nosos arrincarán medíndose ao Numancia de Soria nos Pajaritos, nun duelo histórico e ao grande.
Pola súa banda, o debut no Vero Boquete, á semana seguinte, será cun derbi tamén histórico ante o Pontevedra. Outro duelo de nivel no que se espera un ambientazo como a pasada campaña.
Estes dous partidos servirán de punto de partida para un mes de setembro no que os nosos tamén visitarán ao Deportivo Fabril (14/15) e ao Marino de Luanco (28/29), ademais de recibir ao Langreo (21/22).
En outubro, o Compos medirase na casa contra o recentemente ascendido Escobedo (5/6) e o Guijuelo (19/20) e visitará ao Raio Cantabria (12/13) e ao Real Avilés Industrial (26/27).
Xa en novembro, os dous restantes derbis, con Coruxo (2/3) na casa e Bergantiños (9/10) fóra, así como outros dous duelos ante recentemente ascendidos: visita do Llanera (16/17) e viaxe ao Helmántico para enfrontarse ao Salamanca CF UDS (23/24).
E para pechar o ano, e a primeira volta, partidos na casa contra o Laredo (30N/1D) e o Real Ávila (14/15) e desprazamentos para medirse ante a Real Gimnástica de Torrelavega (7/8) e Real Valladolid Promesas (21/22).
Chegará entón o momento do parón invernal ata 2025, co inicio da segunda volta previsto para o día 12 de xaneiro, ante o Numancia, no Vero Boquete.
A partir de aí, repetirase o patrón de partidos. Pontevedra e Fabril, en xaneiro; Langreo, Marino de Luanco, Escobedo e Raio Cantabria, en febreiro; Guijuelo, Real Avilés Industrial, Coruxo, Bergantiños e Llanera, en marzo; Salamanca, Laredo, Gimnástica de Torrelavega e Real Ávila, en abril; e Valladolid Promesas, en maio. Ese peche de liga contra o filial do Valladolid será no Vero Boquete
“No primeiro mes de competición xa hai partidos bonitos e retos por diante moi interesantes. Pero ao final hai que xogar contra todos e débense afrontar as cousas cando tocan e como tocan. Todos os partidos valen tres puntos, sexa na casa ou fóra, sexa ao principio ou ao final da tempada. O noso único obxectivo é chegar da mellor maneira a cada encontro, en cada momento e en cada contexto. Queremos ser o máis regulares posibles no noso rendemento”, explica o adestrador Antón Permuy.
