-
O extremo dereito Óscar Gil chega desde o RC Celta C e firma por unha tempada
Santiago de Compostela, 22 de xullo de 2024
Óscar Gil Vázquez (Moaña, 15/01/2001) é novo xogador da SD Compostela para a Tempada 2024/25. O extremo dereito chega ao Compos tras unha gran campaña no RC Celta C – Gran Peña na Terceira RFEF para reforzar o ataque compostelanista. Firma por unha campaña.
Óscar Gil é un futbolista habilidoso, rápido, con moito desborde e con gran capacidade goleadora, calidades que xa viña demostrando en categorías inferiores e que consolidou desde o seu debut como sénior. Cunha zurda exquisita, adáptase ás diferentes posicións do ataque, aínda que sempre se desenvolveu mellor desde a banda dereita, para desequilibrar por dentro e demostrar o seu gran golpeo de balón.
Por iso, ese potencial e esa capacidade de crecemento futbolístico levaron á dirección deportiva a afrontar a súa fichaxe para o proxecto compostelanista na Segunda RFEF.
A Compostela, Óscar Gil chega tras unha última tempada na que foi un dos xogadores máis destacados do filial celeste, equipo co que pelexou polo playoff de ascenso á Segunda RFEF ata a última eliminatoria. Un gran ano para o atacante, ao que só lle faltou ese paso final para que fose totalmente redondo. No persoal, pechou a campaña con máis de 2.000 minutos de xogo, repartidos en 33 partidos, nos que ademais marcou 9 goles, os últimos nas semifinais do playoff.
Anteriormente, Óscar Gil creceu na base do Celta, na que entrou con 12 anos para superar etapas ata División de Honra Xuvenil. Tras destacar nas categorías inferiores, chegando mesmo a participar en sesións de adestramento do primeiro equipo, fichou no CD Choco, de Terceira División, no seu primeiro ano como sénior, unha experiencia positiva, con 24 encontros disputados e 2 goles, que o levaron de volta á disciplina do Celta, incorporándose ao equipo C.
En Preferente marcou 8 goles na primeira parte da tempada, repartidos en 14 partidos, antes de que a súa carreira se vise interrompida por inoportunas lesións, afectándolle a ese curso e tamén ao seguinte, xa na Terceira Federación, no que só puido disputar catro partidos.
Xa totalmente recuperado, a pasada tempada recobrou o seu ton físico, a súa confianza e o seu nivel para volver demostrar as grandes calidades que atesoura, un nivel que agora demostrará na SD Compostela, no que será o seu debut na Segunda RFEF.
Con esta confianza e todo o seu potencial, Óscar Gil chega ao Compos con gañas de impactar con forza na parroquia branquiazul. Cheo de ilusión e con moitas gañas, confía en que será un gran ano en terras compostelás.
Benvido e moita sorte, Óscar!
