-
O Compos e HM Hospitales amplían a súa colaboración para a tempada 24/25
Santiago de Compostela, 18 de xullo de 2024
Froito da unión entre HM Hospitales e a SD Compostela, que se amplía para esta Tempada 2024/25, todos os xogadores do Compos pasaron xa os protocolarios recoñecementos médicos en HM Rosaleda.
Antes de iniciar a pretempada, que arrincou onte, os futbolistas branquiazuis realizaron, por quendas, as análises clínicas no laboratorio Abacid do Grupo HM Hospitales e as probas cardiolóxicas, que correron a cargo do Dr. Amaro Cendón, especialista do Servizo de Cardioloxía de HM Rosaleda.
A directora médica de HM Rosaleda, a Dra. Verónica Ángel, agradece á SD Compostela “a confianza que tiveron en HM Hospitales para realizar os devanditos recoñecementos e comprobar que os xogadores están listos para iniciar a pretempada, uns deportistas que estamos seguros que nos darán moitas alegrías durante esta tempada”.
Este foi o paso previo á posta en marcha dun Compos que xa está inmerso en pleno traballo estival, con sete semanas por diante para preparar o inicio de liga.
A realización destes recoñecementos supón un paso máis dentro do compromiso que ten HM Hospitales co deporte local de Santiago.
