-
Adrián Gallego traballará xunto co seu equipo médico especializado en lesións relacionadas co deporte
Santiago de Compostela, 8 de agosto de 2024
O traumatólogo deportivo Dr. Adrián Gallego será o novo xefe dos servizos médicos da SD Compostela para a Tempada 2024/25. Acompañarano, á fronte do tratamento do club, todo o seu equipo profesional especializado en medicina deportiva.
O doutor Adrián Gallego conta cunha dilatada experiencia no ámbito da traumatoloxía deportiva relacionada con distintos deportes. Esta levoulle a ser a día de hoxe o xefe dos servizos médicos do Noia Fútbol Sala, S.D. Sarriana, Club de Remo Cabo de Cruz, Club Halterofilia A Coruña, Rotogal Boiro Voley; traumatólogo de referencia do Burela Pescados Rubén, así como médico da Real Federación Española de Fútbol, coa que viaxa internacionalmente en varias ocasións ao longo do ano.
A súa profesionalidade e capacidade son claves para que actualmente os seus coñecementos e a súa experiencia profesional sexan das máis cotizadas no panorama deportivo actual de distintos ámbitos e disciplinas.
Adrián Gallego é actualmente moi recoñecido na especialidade da traumatoloxía deportiva, xa que aplica técnicas cirúrxicas moi innovadoras e de moi baixo impacto, polo que deportistas de todas as disciplinas, tanto nacionais como internacionais, recorren a el buscando garantías de éxito. Ademais de que o tempo de recuperación no postoperatorio das distintas intervencións chega a reducirse excepcionalmente.
Gallego obtivo distintos recoñecementos nacionais como o Premio Medicina Século XXI dentro da súa especialidade, así como galardóns xeneralistas que non fan máis que reforzar a súa calidade humana e médica.
Más información sobre o Dr. Gallego:
- É Licenciado en medicina e cirurxía pola Universidade de Santiago de Compostela.
- Especialista en Cirurxía Ortopédica e Traumatoloxía (Complexo Hospitalario Universitario de Santiago de Compostela).
- Diploma FIFA en medicina do fútbol.
- Máster Universitario en Patoloxía do Aparello Locomotor pola Universidade de Xaén.
- Máster Universitario en Actualización en Cirurxía ortopédica e traumatoloxía pola Universidade CEU Cardeal Herrera.
- Curso actualización e recertificación en Cirurxía Ortopédica e Traumatoloxía SECOT (Sociedade Española Cirurxía Ortopédica e Traumatoloxía).
- No momento actual, realizando doutoramento: “Papel do P.Acnes na dexeneración discal” pola Universidade de Santiago de Compostela.
