-
O dianteiro Carlos Cinta destaca pola súa capacidade para o remate e o seu bo xogo na área
Santiago de Compostela, 26 de agosto de 2024
A peza que completa o quebracabezas da SD Compostela xa está aquí. Carlos Cinta Sánchez (Mérida, 19/08/1998) é novo xogador do Compos para a Tempada 2024/25. O dianteiro emeritense firma por unha campaña e poñerase mañá mesmo ás ordes de Antón Permuy.
A SD Compostela faise cun dianteiro de área. Un cazagoles que destaca polo súa corpulencia e a súa gran capacidade para o remate, de aí que a gran maioría dos tantos marcados na súa carreira fosen ao primeiro toque. Un ariete de 26 anos, con experiencia na Primeira RFEF, que completará o ataque compostelanista, achegándolle presenza ofensiva e moitos goles.
Carlos Cinta aterra en Santiago tras unha última campaña no Badaxoz, tamén de Segunda RFEF. Nela anotou 5 goles en dezasete encontros, todos eles da primeira volta.
Trátase dun xogador de explosión tardía que, tras uns primeiros anos en equipos locais de Terceira e Rexional Preferente, daría o salto no 2020, campaña na que alternou o filial co primeiro equipo do Mérida, disputando sete encontros na Segunda División B.
En busca dun maior protagonismo, ao curso seguinte baixaría unha categoría para asinar no Don Álvaro, da nova Terceira Federación, onde volvería destacar con 29 partidos disputados e 16 goles anotados.
Este rendemento abriulle de novo as portas do Romano para a tempada 22/23, xa en Primeira Federación, sendo unha das pezas capitais do ataque emeritense. En total disputaría 33 partidos (dous deles de Copa do Rey) nos que marcou 7 goles, sendo un dos máximos goleadores do equipo, repartindo ademais varias asistencias.
De Mérida pasou a Badaxoz e, agora, na súa primeira experiencia lonxe de Estremadura, a Compostela, cidade á que chega cargado de ilusión. Carlos Cinta ten gañas de demostrar esa capacidade goleadora que posúe e coa ambición de darlle moitas alegrías á parroquia compostelanista.
Benvido, Carlos!
