-
O Compos arrincou a liga caendo contra o Numancia por 2-0
Santiago de Compostela, 1 de setembro de 2024
A SD Compostela arrincou a liga cunha derrota en Soria contra o Numancia por 2-0. Dous chispazos dos locais decidiron un encontro igualado no que os nosos tiveron as súas opcións para rascar algún punto.
Un golazo de Alain Ribeiro, á media hora, e un penalti no último minuto, cando o Compos xa estaba envorcado ao ataque, transformado polo capitán Bonilla, decidiron o partido disputado nos Pajaritos.
Pola súa banda, o Compos non puido materializar as súas chegadas, en especial, dúas accións dos seus carrileiros. Un disparo a queimarroupa de Santi de Prado, que recibiu só no punto de penalti, aínda que non foi quen de superar ao porteiro, que despexou o seu golpeo co pé. E outro tiro cruzado e duro de Manu Rivas, rompendo ao espazo, que sacou o gardameta cunha gran estirada.
Agora, os nosos tentarán recuperar sensacións este domingo, na casa, contra o Pontevedra. Será ás 17.00 horas no Vero Boquete.
FICHA TÉCNICA
2 – CD NUMANCIA: Kudakovskiy; Gexan, De Frutos, Diego Royo, Bonilla; David Sanz (Aitor Seguín, m.61), Moustapha; Sanchidrian (Fabio Conte, m.82), Alain Ribeiro (Jony, m.82), Teijeira (Christian Delgado, m.61); e Dieste (Rementería, m.93).
0 – SD COMPOSTELA: Rabanillo; De Prado, Kike (Pablo Crespo, m.74), David Soto, Roque, Ocaña (Manu Rivas, m.80); Samu, Diego (Óscar Gil, m.80); Landeira (Fer Cano, m.52), Hugo Matos (Giuliano, m.52) e Manu Barreiro.
GOLES: 1-0: Alain Ribeiro, min.29; 2-0: Bonilla (p.), min.94.
ÁRBITRO: Masip Vidal (Lleida). Amoestou a Bonilla e Dieste, polo Numancia; e a Roque, Giuliano e David Soto, polo Compos.
INCIDENCIAS: Novo Estadio Los Pajaritos. Xornada 1 do Grupo 1 da Segunda RFEF disputada ante 2.223 espectadores.
