-
O Compos está a un partido da Copa do Rei tras vencer ao Lealtad por 0-2
Villaviciosa, 2 de outubro de 2024
Custou máis de 24 horas, pero a SD Compostela está a tan só un partido de clasificarse para a Copa do Rei. Os nosos superaron por 0-2 ao Lealtad nunha eliminatoria de Copa Federación marcada pola suspensión de onte pola falta de visibilidade das liñas. Na continuación, esta tarde, o Compos foi superior e logrou o pase con dous goles na segunda metade.
O equipo branquiazul demostrou a súa superioridade tanto nos primeiros 18 minutos de onte, nos que sobre o campo encharcado tivo ata tres opcións claras de marcar gol, todas elas desbaratadas por Damián; como esta tarde, no que, nun escenario totalmente diferente, levou o peso do partido para dominar as áreas e o resultado.
O partido decidiuse no segundo tempo, cando os nosos fixeron valer a súa pegada. Pasada a hora de xogo, Carlos Cinta marcaba un golazo que puña ao Compos por diante. O ariete, que se estreou como goleador coa SD Compostela, recibiu de costas e, virándose, mandou un tiro potente coa zurda que se coou na rede.
E xa na recta final, cun Lealtad máis envorcado, os nosos aproveitaron unha contra para sentenciar. Hugo Matos guiou a carreira e cedeuna para Landeira que, con temperanza, controlou e superou ao porteiro. 0-2 e o segundo tanto do canteirán nesta semana.
Ademais, na recta final tamén se viviu o debut, nesta tempada, de Jorge Sálamo.
Coa vitoria o Compos clasificouse para cuartos de final da Copa Federación, eliminatoria na que se xogará un billete para a Copa do Rei. O rival será o Sestao River, de Primeira Federación, un duelo que se disputará en Las Llanas o vindeiro mércores 9 de outubro. Antes, este domingo, novo partido de liga, neste caso no Vero Boquete, contra o Escobedo.
FICHA TÉCNICA
0 – CD LEALTAD: Damián; Pedro Bayón, Omar Hernández, Mateo, Iván Amandi; Marcos Blanco, Babafemo (J. Layman, min. 70); Jorge, Jaime Felgue (Saha, min. 63), Samu Yerpes (Óscar, min. 70); e Álvaro Viña.
2 – SD COMPOSTELA: Iago Domínguez; Roque, Kike, David Soto, Ocaña (Manu Rivas, min. 57); Samu (Álvaro Casas, min. 63), Trasi; Giuliano, Óscar Gil (Santi de Prado, min. 57), Landeira (Sálamo, min. 80); e Carlos Cinta (Hugo Matos, min. 63).
GOLES: 0-1: Carlos Cinta, min.62; 0-2: Landeira, min.80.
ÁRBITRO: García Presa (León). Amoestou a Mateo, polo Lealtad; e a Carlos Cinta e Manu Rivas, polo Compos.
INCIDENCIAS: Campo Municipal Les Caleyes (Villaviciosa). Oitavos de Final da Copa Federación. O partido disputouse en dous días trala cancelación do primeiro encontro por falta de visibilidade das liñas do campo.
