Ransford Selasi, experiencia e poderío físico para o medio

• O mediocentro ganhés Selasi, con experiencia na Primeira RFEF, firma ata final de tempada

Santiago de Compostela, 7 de outubro de 2024

Un reforzo para apontoar o centro do campo do Compos. Ransford Selasi é novo xogador da SD Compostela para a Tempada 2024/25. O mediocentro ganés, con experiencia na Primeira Federación, estaba libre trala súa última campaña na UD Melilla. Firma ata final de tempada.

Selasi é un todocampista que destaca polo seu poderío físico e a súa capacidade para abarcar moito campo. Aos seus 28 anos, conta ás súas costas cunha importante experiencia futbolística, pasando polo fútbol italiano, suízo e español.

A súa carreira futbolística arrincou en Italia, nas categorías inferiores do Pescara, compaxinando o conxunto Primavera co primeiro equipo. No país da bota estaría tamén no Novara, no Fano e na Juventus Next Gen. En total, disputaría 56 encontros en Serie B, 41 en Serie C e 5 de Copa Italia. Ademais, lograría un histórico ascenso a Serie A co Pescara.

De Italia pasou a Suíza, onde xogaría no Lugano e no Kriens, disputando 7 encontros na Superliga e 43 na segunda categoría.

E tras tres campañas en Suíza, chegou a España, recalando nas filas do Ceuta, de Primeira Federación, conxunto polo que fichou no mercado invernal. Xogaría 15 encontros, trece deles coma titular, para superar os 1.000 minutos de xogo.

E o pasado ano, comezou a tempada no Estepona, de Segunda Federación, xogando 15 partidos, doce de titular, na primeira volta; e acabaría na UD Melilla, de Primeira RFEF, equipo no que tamén sería un puntal no centro do campo, disputando 14 encontros, dez deles de inicio.

Con toda esa experiencia, chega a Compostela con gañas de seguir demostrando o seu nivel, deixándoo todo no campo polo bo facer do equipo.

Con moita ilusión e en plena forma, xa que vén de estar adestrando cun equipo do seu país natal, sumouse xa aos adestramentos do equipo e está ao dispor do corpo técnico para xogar esta mesma semana.

Benvido, Selasi!