-
Os goles de Carlos Cinta e Manu Rivas ante o Laredo puxeron a guinda a un novo triunfo branquiazul no Vero Boquete
Santiago de Compostela, 30 de novembro de 2024
Obxectivo cumprido: cuarta vitoria seguida na casa para un Compos que segue crecendo nesta competición. Son xa sete xornadas sen perder, nas que os nosos sumaron cinco triunfos, o último, este sábado, 2-1, contra o Laredo. Tres puntos importantísimos que fixeron bo o empate da semana pasada no Helmántico.
O partido no Vero Boquete contra o Laredo empezou da mellor maneira para o Compos. Aos catro minutos, primeiro gol. Apertura para a subida de Soto, centro deste á área pequena e Carlos Cinta embocouna á rede co corpo. Primeiro tanto do dianteiro na Liga e terceiro no que vai de tempada para alegría da parroquia compostelanista.
Con todo, a pesar do gol, o Laredo soubo reaccionar e conseguiría empatar antes da media hora, nunha gran acción de Diego Marta, que combinou con Isuardi para plantarse ante Rabanillo e conseguir o tanto.
Co 1-1, o Compos volveu á carga e tería as súas opcións antes do descanso nas botas de Manu Barreiro e, sobre todo, Manu Rivas, pero este último atopouse cunha moi boa parada abaixo do porteiro.
Á volta do intermedio, os nosos seguiron cunha marcha máis. O Laredo non saía do seu campo e o tanto estaba ao caer, como así foi. De novo Manu Rivas, avanzou polo seu carril, chegou á frontal e, esta vez si, axustouna perfecta para que Puras non chegase. Golazo do lateral, terceiro xa para el no que vai de Liga, e delirio na bancada.
Con vantaxe de novo, o Compos seguiu insistindo sobre o arco rival e rozaría o terceiro, aínda que sen atopar o premio desexado. Iso deu ás ao Laredo, que o buscou á heroica no tramo final.
O Compos defendeuse ben, protexeu a vantaxe e selou un merecido triunfo na casa. Cuarta vitoria seguida no Vero Boquete para sumar xa 21 puntos e continuar coa boa dinámica. Agora, tocará visita á Ximnástica de Torrelavega, o vindeiro domingo, ás 12.00 horas.
FICHA TÉCNICA
2 – SD Compostela: Rabanillo; David Soto, Álvaro Casas (Santi de Prado, min.62), Pablo Crespo (Hugo Matos, min.84), Ocaña, Manu Rivas (Samu, min.75); Selasi (Diego, min.62), Pablo Antas; Fer Cano, Carlos Cinta (Landeira, min.84) e Manu Barreiro.
1 – CD Laredo: David Puras; Soler, Maza, Ojeda, Antonio Poo; Arriola (Héctor Tirado, min.46), Miguel Peña; Diego Marta (Sanmi, min.66), Andrés Carral (Iker Torre, min.77), Vassilakis (Iván Argos, min.77); e Isuardi (Óliver, min.77).
Goles: 1-0: Carlos Cinta, min.4; 1-1: Diego Marta, min.27; 2-1: Manu Rivas, min.57.
Árbitro: Vila Martín (Asturias). Amoestou a Diego, polo Compos; e a Vassilakis, polo Laredo.
Incidencias: Estadio Vero Boquete de San Lázaro (Santiago de Compostela). Xornada 14 do Grupo 1 da Segunda RFEF disputado ante 1.343 espectadores.
