-
Rabanillo recibiu esta mañá o premio de Mahou Cinco Estrellas tras ser elixido pola afección cos seus votos en X
Santiago de Compostela, 23 de xaneiro de 2025
Javier Rabanillo é o Jugador Cinco Estrellas da SD Compostela da Primeira Volta. O porteiro asturiano recolleu esta mañá o premio no Estadio Vero Boquete, de mans do noso patrocinador Mahou.
Hugo Pérez, Marketing local e de Clientes de Mahou San Miguel en Galicia, foi o encargado de entregarlle o galardón, nun acto no que tamén estiveron os outros candidatos ao premio.
Rabanillo, que fichou este verán polo Compos, foi unha das pezas destacadas desta primeira parte da campaña, sendo titular en todas as xornadas de liga e deixando grandes actuacións baixo os paus. Entre elas, cabe destacar que durante cinco partidos consecutivos estivo sen encaixar un gol. Cinco porterías a cero que se suman a outras dúas, para un total de sete.
Ese rendemento, así como o agarimo que se gañou da bancada compostelanistas, fixéronlle merecedor do premio ao Jugador Cinco Estrellas da Primeira Volta, un galardón que outorgamos, unha tempada máis, grazas ao noso patrocinador Mahou.
Trátase dunha iniciativa moi especial, debido a que se recoñece, por unha banda, aos xogadores máis destacados, e polo outro, aos seus afeccionados, que son os encargados da elección.
Ademais, coa entrega deste premio, Mahou demostra o seu compromiso e o seu fiel apoio ao club, xerando encontros entre persoas en torno ao fútbol, as cales nos axudan a vivir mellor.
