-
Un gol de Markitos permite ao Compos seguir vivo en Liga
Santiago de Compostela, 6 de abril de 2025
A vitoria que tanto se buscou durante semanas chegou para o Compos no debut de Secho no Vero Boquete. 1-0 contra o Salamanca grazas ao gol de Markitos, na primeira metade, que permite ao Compos seguir vivos. Tres puntos vitais que non se poden entender sen o apoio da afección durante todo o duelo.
A vitoria fraguouse nunha boa primeira metade, na que os nosos levaron o peso do partido e acabaron conseguindo ese gol necesario. No 20, un centro perfecto de Roque chegou á cabeza de Markitos no segundo pau para que o atacante volvese marcar e levase a primeira alegría da tarde á bancada. A primeira metade acabou con esa vantaxe mínima ao non poder aproveitar Markitos outra que tivo.
Na segunda, o Salamanca deu un pase adiante e aos nosos custoulles máis, pero o equipo deixouno todo no campo, axudados tamén por unha bancada entregada. Pasaron os minutos e os nosos resistiron, incluso tendo algunha opción nas botas de Hugo Matos. Así, chegouse ao final coa vital vitoria do Compos.
Cos tres puntos, o vindeiro sábado unha nova final, esta vez como visitantes, ante o Laredo. Será ás 18.00 horas no Estadio San Lorenzo.
FICHA TÉCNICA
1 – SD COMPOSTELA: J. Rabanillo; Roque, David Soto, Álvaro Casas (Fausto Tienza, min.72), Pablo Crespo, Ocaña; Samu (Manu Rivas, min.65), Pablo Antas; Fer Cano (Trasi, min.82), Markitos (Carlos Pérez, min.46), e Manu Barreiro (Hugo Matos, min.65).
0 – SALAMANCA CF UDS: Erik Ruiz; Yago, Rubén Cantero, I. Casado, Souley (Murua, min.46); Cristeto (Diego Benito, min.75), De Tomás (Martín Galvan, min.46); Caramelo (Loren, min.65), Curro, Ares (Juancho, min.46); e Emaná.
GOLES: 1-0: Markitos, min.20.
ÁRBITRO: Carbajales Gómez (Asturias). Amoestou a Fer Cano, Álvaro Casas, Hugo Matos e Pablo Crespo, polo Compos; e a Souley, De Tomás e Jon Villanueva (banco), polo Salamanca.
INCIDENCIAS: Estadio Verónica Boquete de San Lázaro (Santiago de Compostela). Xornada 30 de Liga do Grupo 1 da Segunda RFEF disputado ante 1.360 espectadores.
