-
O Xuvenil A do Compos competirá por quinta tempada seguida na máxima categoría nacional
Santiago de Compostela, 6 de maio de 2025
O Xuvenil A da SD Compostela mantense firme na División de Honra e certificou, por quinto ano consecutivo, a súa praza na maior categoría do fútbol xuvenil nacional. Este fito é moito máis que unha simple estatística, posto que o club non pisaba esta categoría dende a tempada 2003-04 e subliña a consistencia e a forma de traballo da Canteira Picheleira, á vez que consolida ao club entre os máis destacados do fútbol base a nivel nacional.
Cada unha destas cinco campañas foi un chanzo firme na consolidación do equipo nunha liga onde só compiten os mellores. O esforzo dos xogadores, técnicos e dirección de canteira foron os piares fundamentais para alcanzar este obxectivo ano tras ano.
Como broche de ouro a este período de crecemento constante, a tempada pasada quedará gravada na memoria de todos coa histórica clasificación do Xuvenil A para a Copa do Rei. Este logro non só enalteceu o nome do club, senón que tamén demostrou a capacidade do equipo para competir ao máis alto nivel xuvenil do país.
Manterse nesta categoría durante un lustro consecutivo é un testemuño do arduo traballo, disciplina e criterio futbolístico que se pretende transmitir na Canteira para que, deste xeito, o club poida continuar medrando.
No que respecta a esta Tempada 2024-25, o Xuvenil A do Compos, a pesar dunha brillante primeira volta na que acadou o 6º posto, tivo unha segunda fase da liga con desafíos inesperados. Con todo, o espírito competitivo deste equipo saíu a relucir no momento decisivo. Cunha demostración de carácter e fútbol de alto nivel, pechou a tempada cunha xeira impresionante de 5 vitorias consecutivas para escalar á 7ª praza final, con 37 puntos, asegurando a permanencia na División de Honra.
