-
Cobre San Rafael será o patrocinador principal do Xuvenil A, á vez que mantén o seu apoio ao primeiro equipo, á Canteira Picheleira e aos Campus Xacobeos
Santiago de Compostela, 7 de maio de 2025
A Sociedade Deportiva Compostela e Cobre San Rafael seguirán camiñando da man durante as dúas próximas tempadas. O Compos e a empresa con sede en Touro renovaron e ampliaron o seu acordo de patrocinio, reforzando aínda máis a súa estreita relación, que se mantén desde fai varias campañas.
Cobre San Rafael non só manterá o seu apoio a todos os equipos da Canteira Picheleira, senón que ademais será tamén o novo patrocinador principal do Xuvenil A de División de Honra, equipo que competirá por quinta tempada consecutiva na máxima categoría nacional.
Ademais, Cobre San Rafael seguirá patrocinando os Campus Xacobeos, tanto de verán como de inverno, e continuará sendo tamén, como nos últimos anos, un dos principais patrocinadores do primeiro equipo da SD Compostela.
Desde o Compos agradecen a Cobre San Rafael a súa confianza no proxecto compostelanista unha vez máis, así como a aposta decidida da compañía polo desenvolvemento do deporte base e o fútbol sénior en Santiago e a súa comarca. Esta alianza reforza o obxectivo común de seguir formando xogadores e persoas baixo os valores do esforzo, a humildade e a superación.
