-
Trasi, tralo seu primeiro ano no primeiro equipo, renova o seu contrato ata 2026
Santiago de Compostela, 20 de xullo de 2025
Un pulmón para o centro do campo da SD Compostela 25/26: Xoel Trasancos Atadell “Trasi” (Viveiro, 29/09/2003) seguirá un ano máis de branquiazul. O mediocentro de Viveiro, que se estreou a pasada campaña como xogador do primeiro equipo do Compos e que ocupa ficha sub23, renova o seu contrato por un ano máis, ata 2026.
Coa renovación de Trasi, Secho asegúrase a continuidade dun perfil físico para a medular. Un futbolista intelixente tacticamente, que abarca moito campo e que destaca por ser un gañador de duelos. Ademais, aos seus 21 anos, tamén conta con capacidade para mover ao equipo a través da posesión.
Será así a segunda tempada ao completo de Trasi co primeiro equipo, despois da súa estrea o pasado curso, aínda que xa debutara cando estaba no filial, disputando minutos en dous encontros da tempada 23/24. No que respecta ao pasado ano, xogou un total de 16 partidos, doce de Liga e catro de Copa Federación.
Formado nas categorías inferiores do Lugo e do Viveiro, Trasi chegou a Santiago no seu último ano de xuvenil, enrolándose no Conxo de Liga Nacional. Tras unha brillante campaña, asinou no Sigüeiro, filial compostelanista. En Preferente estivo dúas campañas, alternando adestramentos co primeiro equipo, sendo unha peza fundamental do equipo con máis de 5.100 minutos disputados, repartidos en 65 partidos. Ademais, neles marcou 2 goles.
Con moita ambición e moitas gañas de seguir demostrando o seu nivel, Trasi quere conseguir o ascenso a Segunda RFEF co Compos.
