-
Roi Graumann, de 20 anos, chega do Pontevedra B e firma por unha tempada
Santiago de Compostela, 21 de xullo de 2025
Un novo gato para a portería da SD Compostela 2025/26: Roi Graumann López (Vigo, 09/01/2005). O mozo porteiro de 20 anos reforza a meta do Vero Boquete, á que chega tras a súa estrea como sénior no Pontevedra B. Terá ficha sub-23 e firma por unha tempada.
O novo porteiro do Compos vivirá a súa segunda campaña como sénior tralo seu debut no filial do Pontevedra, de Preferente Futgal. Co cadro granate disputou 22 partidos de Liga, todos como titular, deixando a portería a cero en 6 encontros. A súa achega axudou ao equipo para terminar a liga en novena posición.
En categorías inferiores, Roi Graumann formouse na base do RC Celta, na que foi escalando categorías ata chegar a Liga Nacional no seu primeiro ano xuvenil. No seu segundo ano asinou no Val Miñor, co que disputou un curso en Nacional e outro en División de Honra, despois de conseguir o ascenso.
Aos seus 20 anos, chega ao Compos coa ambición de seguir crecendo e de demostrar as súas grandes calidades baixo paus, achegando todo o seu traballo para acadar o ascenso.
Benvido, Roi!
